GENESIS-42

Genesis 42 

Buh lei tûrin Aigupta ramah Josefa unaute an kal

1Tin, Jakoba chuan Aigupta ramah buh a awm tih a lo hre ta a; tichuan, Jakoba chuan a fapate hnênah, “Engati nge in inen mai mai ni?” a ti a. 2Tin, amah vêk chuanin, “Ngai teh u, Aigupta ramah buh a awm tih ka lo hre ta; thi lova kan nun chhuah theihna tûrin chutah chuan zuk kal ula, chuta ta chu kan tân zuk lei rawh u khai,” a ti a.

3Tichuan, Josefa uteho sâwm chu Aigupta ram ata buh lei tûrin an zuk kal ta a. 4Josefa nau Benjamina erawh chu a ute hnênah chuan Jakoban a kaltîr ve lo va; “Tawhsual a zuk tâwk hlauh dah ang e,” a ti a ni. 5Tichuan, Israela fapate chu mi kalho zîngah chuan buh lei tûrin an kal ve a; Kanaan ramah pawh ṭâm a tla ve si a. 6Tin, Josefa chu Aigupta ram chungah chuan hotu a ni a, amah chu chumi rama mi zawng zawng hnênah a hralhtu a ni; tichuan, Josefa uteho chu an lo kal a, lei siin amah chibai an bûk hlawm a. 7Tin, Josefa chuan a uteho chu a lo hmu a, anni chu a lo la hre hlawm a; nimahsela, an lakah chuan chi dang angin a insiam a, ram takin a bia a; tin, an hnênah, “Khawi aṭanga lo kal nge in nih?” a ti a. Tin, anni chuan, “Buh lei tûrin Kanaan ram aṭanga lo kal kan ni,” an ti a.

8Tin, Josefa chuan a uteho chu a lo la hria a, anni erawh chuan ani chu an hre si lo. 9Tin, Josefa chuan anmahni chungchâng thu mumanga a hmuhte kha a hre chhuak a, an hnênah, “Enthlatute in nih hi! Ram ruahzia en tûrin in lo kal a nih hi le!” a ti a. 10Tin, anni chuan a hnênah, “Ka pu, ni suh e, i chhiahhlawhte hi buh lei tûra lo kal kan ni asin. 11Mi pakhat fa vek kan ni; mi dik tak kan ni a, i chhiahhlawhte hi enthlatute kan ni awzâwng lo ve,” an ti a. 12Tin, ani chuan an hnênah, “Ka awih lo, ram ruahzia en tûra lo kal in nih hi maw,” a ti a. 13Tin, anni chuan, “Keini i chhiahhlawhte hi unau sâwm leh pahnih, Kanaan rama awm mi pakhat fa kan ni; tin, ngai teh, kan tlum ber chu tûnah chuan kan pa hnênah a awm a, pakhat chu a awm ta lo a ni,” an ti a. 14Tin, Josefa chuan an hnênah, “ ‘Enthlatute in ni’ ka tih che u kha, in nih ngei hi! 15Heti hian fiahin in awm ang: in tlum ber chu heta a lo kal loh chuan, Pharaoa nunna chhâlin, heta ta hi in chhuak lo vang ka ti che u a ni. 16Nangmahniah thutak a awm nge awm lo in thu fiah nân in zînga pakhat tîr ula, in nau chu rawn hruai rawh se, nangni erawh chu phuarin in lo awm rih ang; chuti lo chuan, Pharaoa nunna chhâlin, ‘Enthlatute in ni ngei mai!’ ka ti dâwn che u a ni,” a ti a. 17Tin, an za chuan ni thum a tântîr hlawm a.

18Tin, a ni thum niah chuan Josefa chuan an hnênah, “Heti hian ti ula in nung ang, Pathian ka ṭih si a: 19mi dik tak in nih chuan in unau zîngah hian pakhat phuarin awm rawh se; nangni erawh chu kal ta ula, in chhûngteho ṭâm tân chuan buh phur rawh u. 20Tin, in tlum ber chu ka hnênah rawn hruai ang che u; chutichuan, in thu chu a fiah ang a, in thi dâwn lo nia,” a ti a. Tichuan, chutiang chuan an ti ta a.

21Tin, anni chuan, “Kan nau chunga kan thiltih kha kan thiam lo tak tak a nih hi, khawngaih tûra min ngen ṭâwk ṭâwk laia a thinlung manganzia hmu reng chunga kan ngaihthlâksak duh loh kha; chuvângin, he manganna hian min tlâkbuak a nih hi,” an inti a. 22Tin, Reubena chuan, “ ‘Naupang chungah thil tisual suh u,’ tiin in hnênah ka sawi lo vem ni? In ngaithla duh lo a nih kha; chuvângin, ngai teh u, a thisen phuba chu an la a nih hi,” tiin anni chu a chhâng a.23An kârah ṭawng letlingtu a awm avângin Josefan an thusawi chu a hria tih an hre lo. 24Tin, ani chuan a lehhawisan a, a va ṭap ta a; tin, an hnênah a kîr leh a, anni chu a bia a, an zing ata Simeona chu a hruai hrang a, an mit hmuhah chuan a phuar ta a.

Josefa unaute Kanaan ramah an haw

25Tin, Josefa chuan an bâwmte chu buha tikhat tûr leh an tangkate chu an ipa dah leh ṭheuh tûr leh, kalkawng atân ei tûr pe tûrin thu a pe a; tichuan, chutiang chuan an tihsak ta a. 26Tin, an buh chu an sabengtungte chu an phurhtîr a, chuta ta chu an chhuak ta a. 27Tin, an zînga mi pakhatin, riahbûkah a sabengtung chaw pe tûra a ip a han hawn chuan a tangka chu a hmu ta mai a; ngai teh, a ip rawng bulah chuan a lo awm ta a. 28Tichuan, a unaute hnênah chuan, “Ka tangka kha an lo dah leh a nih hi maw le; ngai teh u, ka ipa hi a lo awm reng mai,” a ti a; tin, an thin a ṭhâwng zawk a, “Pathianin hetia min tih hi engtizia nge ni aw?” tiin khûr chungin an inen ta hlawm a.

29Tin, Kanaan rama an pa Jakoba hnên chu an lo thleng a, an chunga thil thleng zawng zawng chu an hrilh a; 30“Chumi ram hotu chuan ram takin min bia a, ram enthlatuah min puh a. 31Tin, keini chuan a hnênah, ‘Mi dik tak kan ni; enthlatu kan ni awzâwng lo ve. 32Unau sâwm leh pahnih kan ni a, pa pakhat fapate kan ni vek a; pakhat chu a awm ta lo va, kan tlum ber chu tûnah hian Kanaan ramah kan pa hnênah a awm a ni,’ kan ti a. 33Tin, chu mi, an ram hotu chuan kan hnênah, ‘Heti hian mi dik tak in ni tih ka la hria ang: in unau pakhat ka hnênah hnutchhiah ula, in chhûngteho ṭâm tân chuan buh phur ula, kal tawh rawh u. 34Tin, in tlum ber chu ka hnênah rawn hruai ang che u; tichuan, enthlatu in ni lo va, mi dik tak in ni zâwk tih ka hria ang; chutichuan, in unaupa hi ka pe leh ang che u a, he ramah hian in sumdâwng dâwn nia,’ min ti a,” an ti a.

35Tin, heti hi a ni a, an ipte chu an bun ruah laiin, ngai teh, an tangka fûn ṭheuh chu an ipah chuan a lo awm ta ṭheuh va! Tin, anniho leh an pa chuan an tangka fûnte chu an hmuh chuan an hlau hle a. 36Tin, an pa Jakoba chuan an hnênah, “Nangni hian ka fate mi chântîr a nih hi; Josefa a awm tawh lo va, Simeona pawh a awm tawh hek lo, Benjamina lam pawh hruai bo in tum lehzêl a; chûng thil zawng zawng chuan mi tlâkbuak a nih hi,” a ti a. 37Tin, Reubena chuan a pa hnênah, “I hnêna ka rawn hruai leh loh chuan ka fapate pahnih hi that mai ang che; ani chu ka kutah mi kawltîr la, i hnênah ka rawn hruai leh mai ang,” tiin a sawi a. 38Nimahsela, ani chuan, “Ka fapa hi in hnênah a chhuk ve lo vang; a u a thi tawh a, amah chauh hi a ni tawh si a; in kalna kawnglakahte tawhsual a zuk tawh chuan ka lu ṭuak hi lungngaihnain thlânah in liamtîr dâwn a ni,” a ti a.

GENESIS-41

Genesis 41 

Josefan Pharaoa mumang a hrilhfiah

1Tin, kum hnih zet hnuah chuan heti hi a ni a, Pharaoa chuan mumang a nei a; tin, ngai teh, lui kamah hian a lo ding a. 2Tin, ngai teh, bâwngpui pasarih nalh tak tak, thau tak tak hi tui aṭang chuan an lo chhuak chho va, phairuang zîngah hian an lo tla a. 3Tin, ngai teh, bâwngpui dang pasarih pawr tak tak, chêr tak tak hi tui aṭang vêk chuan an hnuah an lo chhuak chho leh a, bâwngpui dangte kiangah lui kamah chuan an lo ding hlawm a. 4Tin, bâwngpui pawr tak tak, chêr tak tak chuan bâwngpui nalh tak tak, thau tak tak chu an ei zo ta mai a. Chutichuan, Pharaoa chu a ṭhangharh ta a. 5Tin, a han muhîl leh a, mumang a nei leh a; tin, ngai teh, buh kûng khatah hian vui sarih lian tak tak, ṭha tak tak hi an lo chhuak a. 6Tin, ngai teh, chumi hnuah chuan vui sarih sîn tê tê, khawchhak thli chhêm ro rim rem hi an lo chhuak leh a. 7Tin, vui sîn tê tête chuan vui sarih lian tak tak, ṭha tak takte chu an lem zo ta mai a. Tin, Pharaoa chu a han ṭhangharh a; tin, ngai teh, mumang a lo ni a. 8Tin, a tûk zingah chuan heti hi a ni a, a rilru chu a lo mangang ta hle a; tichuan, mi a tîr a, Aigupta rama mitlâk dawithiam zawng zawng leh mi fing zawng zawng chu a ko va; tin, Pharaoa chuan a mumang chu a lo hrilh hlawm a; nimahsela, Pharaoa hrilhfiah thei tu mah an awm si lo va.

9Chumi lai chuan uain pe hotu ber chuan Pharaoa hnênah, “Vawiinah hian ka tihsual ka hre chhuak ta. 10Pharaoa a chhiahhlawhte chungah a thinur a; tichuan, vêngtu pâwl hotu inah chuan kei leh chhang siam hotu ber chu min tântîr a. 11Tin, kei leh ani chuan zan khatah mumang kan nei a, mumang awmze hrang ve ve a ni kan neih ni. 12Tin, chutah chuan kan hnênah vêngtu pâwl hotu chhiahhlawh, Hebrai mi, tlangvâl pakhat a awm a; tin, ani chu kan hrilh a, ani chuan kan mumangte chu min hrilhfiah ta a; kan mumang ang zia zêlin a ni min hrilhfiah ve ve ni. 13Tin, heti hi a ni a, min hrilhfiah ang takin a lo awm ta ngei a ni; kei chu ka hnathawh hi mi thawhtîr leh a, chhang siamtu chu khai hlum a ni ta a,” a ti a.

14Chutichuan, Pharaoa chuan Josefa chu a kohtîr ta nghâl a; tichuan, hmanhmawh takin rip ata chu an hruai chhuak ta a; tin, ani chu a inmêt fai a, a silhfên chu a thlâk a, Pharaoa hnênah chuan a va lût a. 15Tin, Pharaoa chuan Josefa hnênah, “Mumang ka nei a, a hrilhfiah thei tu mah an awm lo va; nangin mumang hi a thu i hriat chuan i hrilhfiah thei tih i chanchin hi mi sawi ka lo hria a,” a ti a. 16Tin, Josefa chuan Pharaoa chu a chhâng a, “Chu chu keimaha awm a ni lo ve; Pathianin Pharaoa chu thlamuanthlâk takin a chhâng zawk ang,” a ti a.

17Tin, Pharaoa chuan Josefa hnênah, “Ka mumangah chuan, ngai teh, lui kamah hian ka lo ding a; 18tin, ngai teh, bâwngpui pasarih thau tak tak, nalh tak tak hi tui aṭang chuan an lo chhuak chho va, phairuang zîngah hian an lo tla a. 19Tin, bâwngpui dang pasarih berh tak tak, pawr êm êm, chêr tak tak, chutiang rêng rênga chhia Aigupta ram zawng zawng pawha ka la hmuh ngai loh hi, an hnuah an lo chhuak chho leh a. 20Tin, bâwngpui chêr tak tak, pawr tak takte chuan bâwngpui pasarih thau tak tak lo chhuak hmasate chu an ei zo ta mai a. 21Tin, an ei zawh hnu pawh chuan an ei tih an hriat chuang loh; a tîr ang bawk khân an la pawr ta reng a. Chutichuan, ka ṭhangharh ta a. 22Tin, ka mumang dang lehah chuan, ngai teh, buh kûng khatah hian vui sarih lian tak tak, ṭha tak tak hi a lo chhuak a. 23Tin, ngai teh, chumi hnuah chuan vui sarih vuai sil sel, sîn tê tê, khawchhak thli chhêm ro rim remte hi an lo chhuak leh a. 24Tin, vui sîn tê tête chuan vui sarih ṭha tak takte chu an lem zo ta maiin ka hmu a. Tin, mitlâk dawithiamhote chu ka hrilh a; nimahsela, mi hrilhfiah thei tu mah an awm si lo va,” tiin a sawi a.

25Tin, Josefa chuan Pharaoa hnênah, “Pharaoa mumang hi hmun khat a ni; Pathianin a thiltih tûr chu Pharaoa a hriattîr a nih chu. 26Bâwng pasarih ṭha tak takte chu kum sarih an ni a, vui sarih ṭha tak takte chu kum sarih an ni bawk a; mumang chu hmun khat a ni. 27Tin, an hnua bâwng pasarih chêr tak tak, pawr tak tak lo chhuak chhote chu kum sarih an ni a, vui sarih a sî hlîr, khawchhak thli chhêm ro rim remte nên chuan; chûng chu ṭâm kum, kum sarih tûr a ni. 28Chu chu a ni Pharaoa hnêna ka sawi kha; Pathianin a thiltih tûr chu Pharaoa a hriattîr a nih hi. 29Ngai teh, Aigupta ram chhûng zawng zawngah hian hausak tawntaw kum, kum sarih a lo thleng dâwn; 30chumi hnuah chuan ṭâm kum, kum sarih a lo awm leh ang; tichuan, hausakna zawng zawng kha Aigupta ramah hian theihnghilh vek a ni tawh ang; ṭâm chuan ram hi a ei chhe zo vang. 31Hausakna kha, a zuitu ṭâm avâng chuan he ramah hian an hre tawh lo vang; a nasa hle dâwn si a. 32Tin, mumang Pharaoa vawi hnih a neih nawntîrna chu hemi avâng hian a ni, thiltih tûr chu Pathianin a tihngheha, Pathian vêkin a thlentîr lawk dâwn avângin. 33Chutichuan, tûnah hian Pharaoa chuan mi pakhat bengvâr tak, fing tak mai zawng chhuak sela, Aigupta ram chungah hian hotuah awmtîr rawh se. 34Pharaoan chu chu ti sela; tin, ram chungah hian hotute ruat sela, hausak kum, kum sarih chhûng chuan Aigupta ram buh hi hmun ngaa ṭhena hmun khat zêl khâwm rawh se. 35Tichuan, anni chuan chûng kum ṭhat kum lo thleng tûra buh zawng zawng chu lâwr khâwmin, Pharaoa hnuaia awm tûrin khuaahte la ei atân buh chhûng khâwm sela, vawng tlat rawh se. 36Tichuan, ṭâm avânga ram hi a boral loh nân buh chu ṭâm kum, kum sarih Aigupta rama lo thleng tûr atân chuan he ram atân hian inrin lâwkna tûr a ni ang,” a ti a.

Josefa chu Aigupta ram hotuah a ṭang

37Tin, chu thu chu Pharaoa leh a chhiahhlawhte zawng zawng chuan ṭha an tih zâwng tak a ni a. 38Tin, Pharaoa chuan a chhiahhlawhte hnênah, “Hetiang, Pathian thlarau awmna mi hi kan hmu zo dâwn em ni?” a ti a. 39Tin, Pharaoa vêk chuan Josefa hnênah, “Pathianin chûng zawng zawng chu a hriattîr che avângin, nang anga bengvâr leh fing rêng rêng hi an awm lo ve. 40Nang hi ka chhûngte chungah hotuah i awm ang a, ka khua leh tui zawng zawng hi i thu ang zêlin an awm ang; lalṭhutphaha ṭhut thu-ah chauh hian i aiin ka lal ang,” a ti a. 41Pharaoa vêk chuan Josefa hnênah, “Ngai teh, Aigupta ram zawng zawng chungah hian hotuah ka siam a che,” a ti a. 42Tin, Pharaoan a kut ata a hming nemna zungbun chu a phawi a, Josefa kutah a buntîr a, puan zai sîna siam silhfênte a bel a, a nghâwngah rangkachak ṭhi a awrhtîr a. 43Tin, a tawlailîr neih pahnihnaah chuan a chuantîr a; a hmaah chuan, “Ṭhingṭhi ru,” tiin an au zêl a; tichuan, Aigupta ram zawng zawng chungah chuan hotuah a siam ta a. 44Tin, Pharaoa chuan Josefa hnênah, “Kei Pharaoa ka ni, nangma thu lo chuan Aigupta ram chhûng zawng zawngah hian tu mân an kut emaw, an ke emaw an lek lo vang,” a ti a. 45Tin, Pharaoan Josefa hmingah chuan Zaphenath-panea a vuah a; On khaw puithiam Potiphara fanu Asenathi nupuiah a neihtîr bawk a. Tin, Josefa chu a chhuak a, Aigupta ram chu a fang ta a.

46Tin, Josefa chu Aigupta ram lal Pharaoa hmaa a din lai chuan kum sawmthum mi a ni a. Tin, Josefa chu Pharaoa hnên ata a chhuak a, Aigupta ram zawng zawng chu a fang chhuak ta a. 47Tin, kum ṭhat kum, kum sarih chhûng chuan lei chuan hlâwk takin buh a chhuah ṭhîn a. 48Tin, Aigupta rama kum ṭhat kum, kum sarih lo thlenga buh zawng zawng chu a lâwr khâwm a, buh chu khuaahte chuan a chhûng khâwm ta a; khaw tinah a vêl lova buh ṭheuh chu a chhûng khâwm zêl a. 49Tichuan, Josefa chuan buh chu tam tak, tuifinriata ṭiauvut zât laiin a chhûng khâwm rui a; a chhiar pawh chu a bâng ta hial a, chhiar sên rual a ni ta si lo va.

50Tin, ṭâm lo thlen hma chuan Josefa chuan fapa pahnih a nei a, chu mite chu On khaw puithiam Potiphara fanu Asenathi chuan a hrinsak a ni. 51Tin, Josefan a fa tîr hmingah chuan Manasea a sa a; “Pathianin ka thawh rimna zawng zawng leh ka pa chhûngte zawng zawng chu mi theihnghilhtîr ta si a,” a ti a. 52Tin, a fa pahnihna hmingah chuan Ephraima a sa a, “Pathianin ka hrehawm tuarna ramah hian chi mi thlahtîr ta si a,” a ti a.

53Tin, kum ṭhat kum, kum sarih, Aigupta rama lo thleng chu a lo vei ta a; 54tin, ṭâm kum, kum sarih tûr chu Josefa sawi ang takin a lo thleng ṭan ve ta a. Ram tinah ṭâm a lo tla ta a; Aigupta ram chhûng zawng zawngah erawh chuan ei tûr a awm a.55Tin, Aigupta rama mi zawng zawng chu an ṭâm veleh Pharaoa hnênah ei tûr dîlin an au va; tin, Pharaoa chuan Aigupta mi zawng zawng hnênah chuan, “Josefa hnênah kal ula; a hrilh apiang che u chu ti rawh u,” a ti a. 56Tin, ṭâm chu lei chung zawng zawngah chuan a lo tla ta a; tichuan, Josefa chuan chhûn khâwmna in zawng zawng chu a hawng a, Aigupta mite hnênah chuan a hralh a; Aigupta ramah chuan ṭâm chu a tla nasa hle si a. 57Tin, lei chung zawng zawngah ṭâm chu a tlâk nasat avângin, ram tina mite chu buh lei tûrin Aigupta ramah Josefa hnênah chuan an kal ṭhin a.

GENESIS-40

Genesis 40 

Josefan lung in tâng vete mumang a hrilhfiah

1Tin, chûng thil hnuah chuan heti hi a ni a, Aigupta lal uain petu leh a chhang siamtute chuan an pu Aigupta lal chu an tivui a. 2Tichuan, Pharaoa chu a chhiahhlawh hotu pahnih chungah, a uain pe hotu ber chungah leh a chhang siam hotu ber chungah chuan a thinur ta a. 3Tichuan, vêngtu pâwl hotu inah, tân in, Josefa phuara a awmnaah chuan a tântîr ta a. 4Tin, vêngtu pâwl hotu chuan Josefa chu anmahni a enkawltîr a; tichuan, ani chuan an rawng a bâwl ta a; tin, ni eng zât emaw lai an tâng rih a.

5Tin, tân ina phuara awm, Aigupta lal uain petu leh chhang siamtu chuan, an pahnihin zan khatah mumang awmze hrang ve ve an nei a. 6Tin, a tûk zîngah chuan Josefa chu an hnênah a va lût a, anni chu a va hmu a; tin, ngai teh, an lo lungngai hle a. 7Tichuan, ani chuan, “Engtizia nge vawiin chu lungngai hmêl in va pu ve?” tiin Pharaoa chhiahhlawh hotu, a pu ina tâng vete chu a zâwt a. 8Tin, anni chuan a hnênah “Mumang kan nei a, min hrilhfiah thei tu mah an awm si lo a ni,” an ti a. Tin, Josefa chuan an hnênah “Mumang hrilhfiahnate chu Pathian ta a ni lo vem ni? Khawngaih takin mi han hrilh teh u,” a ti a.

9Tichuan, uain pe hotu ber chuan a mumang chu Josefa a hrilh a, a hnênah, “Ka mumangah chuan ngai teh, ka hmaah hian grêp hrui a lo awm a; 10grêp hruiah chuan pêng pathum a awm bawk a; tin, chawr chhuak angin a lo awm a, a pârte a lo chhuak a; a pâr bâwrte chuan grêp hminte a rawn chhuah ta a. 11Tin, Pharaoa no chu ka kutah hian a lo awm a; tichuan, grêp rahte chu ka lo va, Pharaoa novah chuan ka sâwr a, no chu Pharaoa kutah ka lo pe a,” a ti a. 12Tin, Josefa chuan a hnênah, “Hei hi a hrilhfiahna a ni: pêng pathum chu ni thum a ni. 13Tûn achin ni thumah Pharaoan i lu a chawi kâng ang a, i hnathawh chu a thawhtîr leh ang che; tichuan, a uain petu i nih laia i pêk dân pângngai ang khân Pharaoa no chu a kutah i pe leh dâwn a nih chu. 14Amaherawhchu, i chan ṭhat leh hunah chuan mi han hre reng la, khawngaih takin ka chungah khawngaihna rawn lantîr ang che; Pharaoa hnênah ka chanchin han sawi la, he in ata hi mi hruai chhuak ang che. 15Hebrai-ho ram ata miin a rûka an rûk bo ka ni a; he ramah pawh hian rip chhûnga mi khungna khawp eng mah ka tisual hek lo,” a ti a.

16Chhang siamtu chuan hrilhfiahna chu a ṭha tih a hriatin Josefa hnênah chuan, “Kei pawh mumang ka nei a; ngai teh, chhang vâr, fawng pathumin ka lo chhîpchhuan a. 17Tin, fawng chungnung berah chuan Pharaoa chaw, chhang siamtu siam, chi tinrêng hi a lo awm a; tin, chûng chu savaten ka fawng chhîpchhuan ata chu an lo ei noh noh va,” a ti a. 18Tin, Josefa chuan a chhâng a, “Hei hi a hrilhfiahna a ni: fawng pathum chu ni thum a ni. 19Tûn achin ni thumah chuan Pharaoan i taksa ata i lu a chawi kâng ang a, thing lêrah a khai ang che; tichuan, savaten i sa chu an ei noh noh dâwn a nih chu,” a ti a.

20Tin, heti hi a ni a, a ni thum ni, Pharaoa pian champhaphâk niah chuan, ani chuan a chhiahhlawh zawng zawngte tân ruai a ṭheh a; tin, a chhiahhlawhte zinga mi uain pe hotu ber lu leh chhang siam hotu ber lu chu a chawi kâng ta a. 21Josefan anmahni a hrilhfiah ang takin, uain pe hotu ber chu uain petuah a ṭantîr leh a; tichuan, no chu Pharaoa kutah chuan a pe leh ta a; 22chhang siam hotu ber erawh chu a khai hlum ta a. 23Nimahsela, uain pe hotu ber chuan Josefa chu a hre reng ta awzâwng lo va; a theihnghilh ta mai a.

GENESIS-39

Genesis 39 

Josefa leh Potiphara nupui

1Tin, Josefa chu Aigupta ramah an hruai chhuk a; tin, Pharaoa hnuaia hotu pakhat, vêngtu pâwl hotu, Aigupta mi, Potiphara chuan chuta rawn hruai chhuktu Ismael-hote kut ata chu a lei ta a. 2Tin, Lalpa chu Josefa hnênah a awm a; tichuan, ani chu mi vânnei tak a ni a; tin, a pu Aigupta mi inah chuan a awm a. 3Tin, a pu chuan Lalpa chu a hnênah a awm a, a thiltih apiang Lalpan a kutah a hlawhtlintîr tih a lo hre ta a. 4Tichuan, Josefa chuan a pu mit a tlung a, a rawng a bâwl ṭhîn a; tin, ani chuan a chhûngte chungah chuan hotuah a siam a, a neih zawng zawng a kutah a dah ta vek a. 5Tin, heti hi a ni a, inah chuan hotuah a siam a, a neih zawng zawng chunga hotua a siam achinah chuan, Josefa avângin Lalpa chuan Aigupta mi chhûngte chu mal a sâwm ta a; in lam leh ram lama a neih zawng zawng chu Lalpan mal a sâwm ṭhîn a. 6Tichuan, a neih zawng zawng chu Josefa kutah a dah tlat a, a hnêna thil awm rêng rêng chu a hriatpui hauh lo va, ama chaw ei chauh lo chu a hre lo. Tin, Josefa chu mi tlâwntlai ṭha tak a ni a, a hmêl pawh a ṭha hle a.

7Tin, chûng hnuah chuan heti hi a ni a, a pu nupui chuan Josefa chu a ngaihmelh a; tin, “Mi mutpui rawh,” a ti a. 8Ani erawh chuan a duh lo va, a pu nupui hnênah chuan, “Ngai teh, ka pu chuan he inah hian ka hnênah eng eng nge awm a hre si lo va, a neih zawng zawng ka kutah hian a dah vek a; 9he inah hian ka aia lian zâwk tu mah an awm lo va; a nupui i nih avângin nangmah chauh lo chu ka lakah eng mah ui a nei hek lo; chutichuan, engtin nge he sual lian tak hi tiin Pathian chunga thil ka tihsual theih ang?” a ti a. 10Tin, heti hi a ni a, ni tin maiin Josefa chu be ṭhîn mah sela, amah mutpui lam thu emaw, ama hnêna awm lam thu emaw a pawm duh lo va.

11Tin, chumi lai vêl chuan heti hi a ni a, a hna chu thawk tûrin in chhûngah a va lût a; tin, chutah chuan an in awm rêng rêng tu mah an awm lo va. 12Tichuan, ani chuan, “Mi mutpui rawh,” tiin a silhfênah a lo man a; tin, ani chuan a silhfên chu a kutah chuan a tlânsan a, a chhuak ta daih a. 13Tin, heti hi a ni a, a silhfên chu a kuta hnutchhiahin a tlân chhuak ta tih a hriat veleh, 14a in awmte chu a ko va, an hnênah, “En teh u, mi timualpho tûrin Hebrai mi pakhat kan hnêna a hruai luh tâk hi! Mi mutpui tumin ka hnênah hian a lo lût a; tichuan, aw ring takin ka au ta a. 15Tin, heti hi a ni a, aw chhuahin ring takin ka au tih a hriat veleh, ka kiangah a silhfên hi a tlânsan a, a chhuak ta daih a ni,” a ti a.

16Tin, Josefa pu a lo hâwn hma loh chuan a silhfên chu a kiangah a lo dah reng a. 17Tin, a hnênah hetiang thu hi a lo sawi a, “Hebrai chhiahhlawh kan hnêna i rawn hruai kha, mi tihmualpho tumin ka hnênah a lo lût a; 18tin, heti hi a ni a, aw chhuaha ka au veleh ka kiangah a silhfên hi hnutchhiahin a tlân chhuak ta a ni,” a ti a. 19Tin, heti hi a ni a, Josefa pu chuan a nupuiin a hnêna, “I chhiahhlawh hian heti hian mi ti,” tia a thusawi a han hriat chuan a thin a lo ur ta thut a. 20Tichuan, Josefa pu chuan ani chu a hruai a, tân in, lal mi tâng phuara an awmnaah chuan a khung ta a; tichuan, chuta tân inah chuan a awm ta a.

21Nimahsela, Lalpa chu Josefa hnênah a awm zêl a, a chungah ngil a nei a, tân in vêngtu pawh a khawngaihtîr a.22Tichuan, tân in vêngtu chuan tân ina tângho awm zawng zawng chu Josefa kutah a kawltîr ta vek a; tichuan, chuta an tih apiang chu Josefa chu a titu a ni zêl ṭhîn a. 23Lalpa chu Josefa hnênah a awm a, a thiltih apiang chu Lalpa chuan a hlawhtlintîr ṭhin avângin, tân in vêngtu chuan a kuta thil awm rêng rêng chu a en duh ta lo va.

GENESIS-38

Genesis 38 

Juda leh Tamari

1Chumi lai chuan heti hi a ni a, Juda chu a unaute hnên ata a chhuk a, Adulam mi pakhat a hming Hira chu a zuk bêl ta a. 2Tin, Juda chuan chutah chuan Kanaan mi pakhat a hming Sua fanu a hmu a; tin, ani chu a nei a, a pâwl ta a. 3Tichuan, a rai a, fapa a hring a; tin, Judan a hmingah chuan Era a sa a. 4Tin, a rai leh a, fapa a hring leh a; tin, a nuin a hmingah chuan Onana a sa a. 5Tin, fapa a hring leh pek a, a hmingah chuan Sela a sa a; chu mi chu a hrin lai chuan Juda chu Kezib khuaah a awm a. 6Tin, Juda chuan a fa tîr Era chu nupui a neihsak a, a hming chu Tamari a ni a. 7Tin, Juda fa tîr Era chu Lalpa mit hmuhin mi sual a ni a; tichuan, Lalpan ani chu a tihlum ta a. 8Tin, Juda chuan Onana hnênah, “I u nupui chu pâwl la, pasalte unau tih tûr chu tihsak la, i u tân chuan chi thlahsak rawh,” a ti a. 9Tin, Onana chuan chi thlah tûr chu ama thlah a ni dâwn lo tih a hria a; tichuan, heti hi a ni a, a u nupui a pâwl apiangin, a u tân chi a thlahsak lohna tûrin leiah chuan a titla ṭhîn a. 10Tin, a thiltih dân chu Lalpa mit hmuhah chuan sual tak a ni a; tichuan, ani pawh chu a tihlum ta a. 11Tin, Juda chuan a monu Tamari hnênah chuan, “Ka fapa Sela hi a puitlin hma loh chuan i pa in lamah pasal nei lovin lo awm rih ang che,” a ti a. “Chuti lo chuan, ani pawh hi a ute angin a thi dah ang e,” a ti a ni. Tichuan, Tamari chu a pa in lamah chuan a va awm ta a.

12Tin, a nakinah chuan Sua fanu Juda nupui chu a thi a; tin, Juda chuan a ngaih a lo reh a, Timna khuaah a berâm hmul mêttute hnên lamah chuan, amah leh a ṭhian Adulam mi Hira chu an chho ta a. 13Tin, miin Tamari chu, “I pu chu a berâm hmul mêt tûrin Timna khuaah a chho dâwn,” tiin an hrilh a. 14Tichuan, ani chuan a pasal sûnna silhfênte chu a hlîp a, inkhuhna puanin a inkhuh a, a intuam tlat a, Timna khaw kawnga Enaim kulh kawngkaah chuan a lo ṭhu a; Sela chu a puitling tawh si a, a pa chuan a nupuiah a neihsak lo zo a ni tih a hria a ni. 15Tin, Juda chuan ani chu a hmuh chuan nawhchizuarah a ruat a; a hmai a inkhuh tlat si a. 16Tichuan, kawng sira hmeichhe lam chu a va pan a, “Hawh, khawngaih takin i mu dûn ang,” a ti a; a mo kha a ni tih a hre si lo va. Tin, ani chuan, “Mi mutpui chuan eng nge mi pêk ang?” a ti a. 17Tin, ani chuan, “Ran rual zinga mi kêlno ka thawn ang che,” a ti a. Tin, ani chuan, “Chu chu i rawn thawn hmaa lo hrên tûr eng emaw tal mi pe ang em?” a ti a. 18Tin, ani chuan, “Hrên tûr eng nge ka pêk ang che?” a ti a. Tin, ani chuan, “I hming nemna leh i hrui, i tiang ken nên khân,” a ti a. Tichuan, a pe a, a mutpui ta a; tin, a lakah chuan fa a pai ta a. 19Tin, a tho va, a inkhuhna puan chu a hlîp a, a hmeithaina silhfênte chu a inbel leh ta a.

20Tin, Juda chuan a thil hrên chu chu hmeichhe kut ata la tûrin a ṭhianpa, Adulam mi kutah chuan kêlno chu a thawn a; nimahsela, ani chuan amah chu a va hmu zo si lo va. 21Chutichuan, hmeichhe awmna hmuna mite hnênah chuan, “Kawng sîra Enaim-a nawhchizuar awm kha khawiah nge a awm tâk?” tiin a zâwt a. Tin, anni chuan, “Nawhchizuar rêng hetah an awm lo ve,” an ti a. 22Tin, Juda hnênah chuan a kîr leh a, “Amah chu ka hmu zo lo, a hmuna mite pawhin, ‘Nawhchizuar rêng rêng hetah an awm lo,’ an ti bawk a,” a ti a. 23Tin, Juda chuan, “Nei hlen mai rawh se; chuti lo chuan, kan mualpho dah ang e; ngai teh, he kêlno hi ka thawn a, amah i hmu zo si lo va,” a ti a.

24Tin, thla thum emaw lai chinah chuan miin Juda chu, “I monu Tamari chuan tlangvâl a ngai a; chu lo pawh chu, ngai teh, sâwn a pai nghe nghe asin,” tiin an hrilh a. Tin, Juda chuan, “Hruai chhuak ula, hâl hlumin awm rawh se,” a ti a. 25Tin, an hruai chhuah chuan Tamari chuan, “Hêng thil neitupa lakah hian a ni, nau ka pai ni,” tiin a pu hnênah chuan mi a tîr ta a; amah vêkin, “Khawngaih takin hêng hming nemna te, hrui te, tiang te hi tu ta nge ni, en chiang teh khai,” a ti bawk a. 26Tin, Juda chuan chûng thil chu a ta a ni tih a lo hria a, “Ani chu ka aiin a fel zâwk a ni; ka fapa Sela ka neihtîr ta si lo va,” a ti a. Tin, Juda chuan ani chu a pâwl leh ta hauh lo va.

27Tin, nau a vei lai chuan heti hi a ni a, ngai teh, a chhûlah chuan phîr an lo awm a. 28Tin, heti hi a ni a, nau a vei chuan pakhat chuan a kut a rawn zen chhuak a; tichuan, nau chhar mi chuan, “Hei hi a chhuak hmasa zâwk a nih hi,” tiin a chelh a, a kutah chuan la sen a buntîr a. 29Tin, heti hi a ni a, a kut chu a lâk luh leh lai chuan, ngai teh, a unau chu a lo chhuak ta a; tichuan, nau chhar mi chuan, “Engati nge chhuahna i insiam ni?” a ti a; chuvângin, a hmingah chuan Pereza an sa a. 30Tin, chumi hnuah chuan a unau, a kuta la sen bun kha a lo chhuak leh a; a hmingah chuan Zera an sa a.

GENESIS-37

Genesis 37 

Josefa leh a unaute

1Tin, Jakoba chu a pa mikhualna ram, Kanaan ramah chuan a awm ta a, 2Hêng hi Jakoba thlahte chanchin a ni. Josefa chu kum sawm leh kum sarih mi a nihin, a ute nên ran rual an thlah a; ani chu naupang a la ni a, a pa nupuite Bilhaii leh Zilpaii fapate hnênah a awm a; tin, Josefa chuan an sual thuthang chu an pa hnênah a thlen a. 3Tin, Israela chuan Josefa chu a tar lam fa a nih avângin a fate zawng zawng ai chuan a hmangaih zâwk a; tichuan, kawrfual ze hrang hranga zia a siamsak a. 4Tin, an pa chuan ani chu a ute zawng zawng aiin a hmangaih zâwk tih a ute chuan an lo hre ta a; tichuan, ani chu an haw ta hle a, ṭawngkam ṭha rêng rêng a chungah an rawlh thei ta lo va.

5Tin, Josefa chuan mumang a nei a, a ute hnênah chuan a hrilh a; tichuan, ani chu an haw lehzual ta a. 6Tin, ani chuan an hnênah, “Khawngaih takin ka mumang hi lo ngaithla teh u: 7ngai teh u, lovah hian buhphalte kan lo têl a; tin, ngai teh u, ka buhphal chu a lo tho va, a ding ta luah a; tin, ngai teh u, in buhphalte chuan an rawn hual vêl a, ka buhphal chu chibai an bûk hlawm a,” a ti a. 8Tin, a ute chuan a hnênah, “Nang tehchai hian kan chungah ro i rêl tehlul ang maw? Nang tehchai hian kan chungah thu i nei tehlul ang maw?” an ti a. Tichuan, a mumang avâng leh a thusawi avâng chuan amah chu an haw lehzual sauh va.

9Tin, mumang dang a nei leh a, a ute chu a hrilh leh a, “Ngai teh u, mumang ka nei leh ta a; ngai teh u, ni te, thla te, arsi sâwm leh pakhatte khian chibai mi lo bûk zuk nia maw le,” a ti a. 10Tin, a pa chu a hrilh a, a uteho pawh; tichuan, a pa chuan a zilh a, a hnênah, “Mumang i neih hi eng mumang nge maw ni? Kei leh i nu leh i ute hian lei siin chibai kan rawn bûk tehlul dâwn che maw?” a ti a. 11Tin, a uten ani chu an îtsîk a; a pa erawh chuan a thusawi chu a rilruin a vawng reng a.

Josefa an hralh a, Aigupta ram a thleng

12Tin, a ute chu Sekem-ah chuan an pa ran rual chu thlahin an kal a. 13Tin, Israela chuan Josefa hnênah, “I uten Sekem-ah alâwm maw ran rual chu an thlah? Lo kal teh, an hnênah ka tîr ang che,” a ti a. Tin, ani chuan a hnênah, “Mi tîr ta che,” a ti a. 14Tin, ani chuan a hnênah. “Va kal ta la, i ute chu an dam emaw, ran rualte pawh an dam emaw va chian ta la, chanchin mi rawn hrilh leh ang che,” a ti a. Chutichuan, Hebron ruam ata chu a tîr chhuak a; tin, ani chuan Sekem chu a va thleng a.

15Tin, mi tuin emaw amah chu a hmu a, ngai teh, phûlah chuan a vâk a vâk a; tichuan, mi chuan, “Eng nge i zawn le?” tiin a zâwt a. 16Tin, ani chuan, “Ka ute ka zawng a ni; khawngaih takin ran rual an thlahna chu mi hrilh teh khai,” a ti a. 17Tin, mi chuan, “Heta ṭangin an chhuah tâk kha, ‘Dothan-ah i kal ang u,’ an tih chu ka hria,” a ti a, Tin, Josefa chuan a ute chu a ûm a. Dothan-ah chuan a va hmu a. 18Tin, anni chuan hla tak aṭangin an lo hmu a; tichuan, an kiang hnai a thlen hmain amah thah thu an phiar ta a. 19-20Tin, “En teh u, mang neia chu a lo kal saw. Hawh u, that ila, khuarkhurum pakhatah i thlâk ang u khai; tin, ‘Sakawlhin a seh ta,’ kan ti dâwn nia; tichuan, a mangte chu engtin nge a awm kan la hre mai ang,” an ti hlawm a. 21Tin, Reubena chuan chu chu a lo hria a, an kut ata a chhanchhuak a; “A thah êm chu i that suh ang u,” a ti a. 22Tin, Reubena vêk chuan a pa hnêna a hruai lehna tûrin, an kut ata chu a chhanchhuah theih nân an hnênah chuan, “Thisen chu chhuah suh u; thlalêra khuarkhurumah hian thlâk ula, kut zawng a chungah thlâk suh u,” a ti a.

23Tin, heti hi a ni a, Josefa chuan a ute hnên a va thlen chuan, Josefa chu a kawrfual, a kawrfual ze hrang hranga zia a hâk chu an lo hlihsak a; 24tin, an hruai a, khuarkhurumah chuan an thlâk ta a; khuarkhurum chu a ruak, tui awm tawh lo a ni a. 25Tin, chaw ei tûrin an han ṭhu hlawm a; tin, an han dâk a, an en a; tin, ngai teh, Ismael khualzinho, Gilead ram aṭanga an sanghâwngseia englo rimtui leh thinghnai damdawi leh murra phura, Aigupta rama zuk kal tûrte an lo kal a. 26Tin, Juda chuan a unaute hnênah, “Kan nau kan thaha, a thisen chhuak kan zêp chuan eng nge hnemhnânna awm ang? 27Hawh u, a chunga kut thlâk lovin, Ismael-ho hnênah sâwn i hralh zâwk ang u; amah hi kan nau, kan tisa ngei a ni si a,” a ti a. Tin, a unaute chuan a thu chu an zâwm ta a. 28Tin, Midian-ho sumdâwngte an lo kal a; tichuan, Josefa chu khuarkhurum ata chu an kai chhuak a, Ismael-hote hnênah chuan, Josefa chu tangka sawmhnihin an hralh ta a, Tin, Josefa chu Aigupta ramah an hruai ta a.

29Tin, Reubena chu khuarkhurumah a lo kal leh a; tin, ngai teh, Josefa chu khuarkhurumah chuan a lo awm ta lo va; tichuan, a silhfênte a pawt thlêr ta a. 30Tin, a naute hnênah a kal leh a, “Taitea kha a awm ta lo, kei hi khawiah nge ka kal tâk ang le aw?” a ti a. 31Tin, Josefa kawrfual chu an la a, kêlpa an talh a, a thi-ah chuan kawrfual chu an hnim a; 32tin, kawrfual ze hrang hranga zia chu an thawn a, an pa hnênah chuan an rawn la a; tin, “Hei hi kan hmu ngawt a, i fapaa kawrfual a ni nge ni lo en teh,” an ti a. 33Tin, ani chuan a lo hre mai a, “Ka fapaa kawrfual a nih hi! Sakawlhin a seh ta zuk nia le; Josefa chu matheilovin pawh sawm vekin a awm a ni ngei ang,” a ti a. 34Tichuan, Jakoba chuan a silhfênte a pawt thlêr a, saiip puan a fêng a, ni rei tak a fapa chu a sûn a. 35Tin, a fapate zawng zawng leh a fanute zawng zawng chu amah thlamuan tûrin an tho va; nimahsela, ani chuan thlamuan a duh lo va; “Lusûn chungin thlânah ka fapa hnênah chuan ka liam dâwn e,” a ti a. Tichuan, a pa chu amah ngaiin a ṭap ṭhîn a. 36Tin, Midian-ho chuan Josefa chu Aigupta ramah an luhpui a, Pharaoa hnuaia hotu pakhat, vêngtu pâwl hotu, Potiphara hnênah chuan an hralh a.

GENESIS-36

Genesis 36 

Esauva thlahte

(1 Chro 1.34-37)

1Tin, hêng hi Esauva thlahte chu an ni (Esauva chu Edoma a ni). 2Esauva chuan a nupuite chu Kanaan rama nula zînga mi a ni a neih ni: Hit mi Elona fanu Adai leh, Hiv mi Zibeona tunu, Ana fanu Oholibami-te chu an ni; 3Ismaela fanu, Nebaiotha farnu Basemathi nên chuan. 4Tin, Adai chuan Esauva chu Eliphaza a hrinsak a; Basemathi chuan Reuela a hring a; 5Oholibami chuan Jeusa leh Jalama leh Kora a hring a; chûng chu Esauva fapa, Kanaan rama a neihte an ni. 6Tin, Esauva chuan a nupuite leh, a fapate leh, a fanute leh a ina mi zawng zawng leh a rante leh a sa zawng zawng leh, a sum zawng zawng, Kanaan rama a hmuhte chu a chhawm a, a nau Jakoba hnên ata chu ram dangah a kal ta daih a. 7An thil neihte chu a nasa lutuk a, an awm dûn thei lo a ni; an rante avângin an mikhualna ram chuan a daih ta si lo va. 8Tichuan, Esauva chu Seir tlângah chuan a awm ta a; Esauva chu Edoma a ni a.

9Tin, hêng hi Seir tlânga Edom-ho thlahtu Esauva thlahte chu an ni. 10Hêng hi Esauva fapateho hming chu a ni: Eliphaza, Esauva nupui Adai fapa leh Reuela, Esauva nupui Basemathi fa hi. 11Tin, Eliphaza fapate chu Temana te, Omara te, Zephova te, Gatama te, Kenaza te an ni. 12Tin, Timni chu Esauva fapa Eliphaza hmei a ni a; ani chuan Eliphaza chu Amaleka a hrinsak a. Chûng chu Esauva nupui Adai fapate chu an ni. 13Tin, hêng hi Reuela fapate chu an ni: Nahatha leh Zera te, Sama leh Miza te hi. Chûng chu Esauva nupui Basemathi fapate chu an ni.

14Tin, hêng hi Zibeona tunu, Ana fanu Esauva nupui Oholibami fapate chu an ni: ani chuan Esauva chu Jeusa leh Jalama leh Kora chu a hrinsak a.

15Hêng hi Esauva fapate zînga a hotute chu an ni: Esauva fa tîr Eliphaza fapate chu: hotu Temana te, hotu Omara te, hotu Zephova te, hotu Kenaza te, 16hotu Kora te, hotu Gatama te, hotu Amaleka te hi; chûng chu Edom rama Eliphaza laka chhuak hotute chu an ni; chûng chu Adai fapate chu an ni.

17Tin, hêng hi Esauva fapa Reuela thlahte chu an ni: hotu Nahatha te, hotu Zera te, hotu Sama te, hotu Miza te hi; chûng chu Edom rama Reuela laka chhuak hotute chu an ni; chûng chu Esauva nupui Basemathi fapate chu an ni.

18Tin, hêng hi Esauva nupui Oholibami fapate chu an ni: hotu Jeusa te, hotu Jalama te, hotu Kora te hi; chûng hotute chu Ana fanu, Esauva nupui Oholibami hrinte chu an ni. 19Chûng chu Esauva fapate chu an ni, chûng chu an zînga hotute chu an ni; Esauva chu Edoma a ni.

Seira thlahte

(1 Chro 1.38-42)

20Hêng hi Hor mi Seira fapa, chu rama awmte chu an ni: Lotana te, Sobala te, Zibeona te, Ana te, 21Disona te, Ezera te, Disana te hi; chûng chu Edom rama Seira fa Hor-ho laka chhuak hotute chu an ni. 22Tin, Lotana fate chu Horia leh Hemama an ni; Lotana farnu chu Timni a ni. 23Tin, hêng hi Sobala fate chu an ni: Alvana te, Manatha te, Ebala te, Sephova te, Onama te hi. 24Tin, hêng hi Zibeona fate chu an ni: Aia leh Ana hi; he Ana hi a ni, a pa Zibeona sabengtungte a thlah laia thlalêra tuilum khurte hmuchhuaktu kha ni. 25Tin, hêng hi Ana fate chu an ni: Disona leh Ana fanu Oholibami hi. 26Tin, hêng hi Disona fate chu an ni: Hemdana te, Esbana te, Ithrana te, Kerana te hi. 27Hêng hi Ezera fate chu an ni: Bilhana te, Zaavana te, Akana te hi. 28Hêng hi Disana fate chu an ni: Uza leh Arana hi. 29Hêng hi Hor-ho laka chhuak hotute chu an ni: hotu Lotana te, hotu Sobala te, hotu Zibeona te, hotu Ana te, 30hotu Disona te, hotu Ezera te, hotu Disana te hi; chûng chu Seir rama an hotu dang anga Hor-ho laka chhuak hotute chu an ni.

Edom ram lalte

(1 Chro 1.43-54)

31Hêng hi lal rêng rêngin Israela thlahte chunga ro an rêl hmaa, Edom rama rorêltu lalte chu an ni: 32Beora fapa Bela chuan Edom ramah ro a rêl a; a khawpui hming chu Dinhaba a ni. 33Tin, Bela chu a thi a, Bozra khuaa mi Zera fapa Jobaba chuan a aiawhin ro a rêl ta a. 34Tin, Jobaba chu a thi a, Teman-ho rama mi Husama chuan a aiawhin ro a rêl ta a. 35Tin, Husama chu a thi a, Bedada fapa Hadada, Moab phûla Midian-ho thattu khân a aiawhin ro a rêl ta a; a khawpui hming chu Avith a ni. 36Tin, Hadada chu a thi a, Masreka mi Samla chuan a aiawhin ro a rêl ta a. 37Tin, Samla chu a thi a, Luipui kama Rehoboth khuaa mi Saula chuan a aiawhin ro a rêl ta a. 38Tin, Saula chu a thi a, Akbora fapa Baal-hanana chuan a aiawhin ro a rêl ta a. 39Tin, Akbora fapa Baal-hanana chu a thi a, Hadara chuan a aiawhin ro a rêl ta a; a khawpui hming chu Pau a ni; a nupui hming chu Mehetabeli a ni a, ani chu Mezahaba fa Matredi fanu chu a ni. 40Tin, hêng hi an chhûngkua ang zêl leh, an hmun ang zêl leh, an hming ang zêlin Esauva thlah hotute hming chu a ni: hotu Timna te, hotu Alva te, hotu Jethetha te, 41hotu Oholibama te, hotu Ela te, hotu Pinona te, 42hotu Kenaza te, hotu Temana te, hotu Mibzara te, 43hotu Magdiela leh hotu Irama-te hi; chûng chu an ram neihah chuan an awmna ang zêlin Edoma thlah hotute chu an ni; chu Esauva chu Edom-ho thlahtu chu a ni.