EXODUS-40

Exodus 40 

Lalpa chênna bûk tundin thu leh hlan thu

1Tin, Lalpan Mosia hnênah, 2“A thla khatna ni khat niah chuan inbiakna puan in biakbûk chu i din tûr a ni. 3A chhûngah chuan thuhriattîrna bâwm i dah tûr a ni a, bâwm chu puanzârin i daidang tûr a ni. 4Dawhkân kha la lûtin, a chunga thil awmte chu i dah fel tûr a ni; khâwnvâr dahna kha la lûtin, a khâwnvârte chu i dah tûr a ni. 5Rimtui hâlna rangkachak maichâm kha thuhriattîrna bâwm hmaa dahin, biakbûk kawngka puanzâr kha i zâr tûr a ni. 6Tin, hâlrala thilhlanna maichâm kha inbiakna puan in biakbûk kawngka bulah i hûng tûr a ni. 7Tin, inbiakna puan in leh maichâm inkârah chuan maihûn hûngin, chutah chuan tui i dah tûr a ni. 8Tin, biakbûk vêl chuan a hung chhûng kawtlai siamin, a hung chhûng kawtlai kawngka puanzâr chu i zâr tûr a ni.

9“Tin, hriak thih mi lain, biakbûk leh a chhûnga awm zawng zawngte chu hnawihin, i tithianghlim tûr a ni, a bungbêl zawng zawngte nên; tichuan, a lo thianghlim ang. 10Tin, hâlrala thilhlanna maichâm leh a hmanrua zawng zawngte chu hriak hnawihin, maichâm chu i tithianghlim tûr a ni; tichuan, maichâm chu thianghlim tak a lo ni ang. 11Tin, maihûn leh a hûnchhan chu hriak hnawihin i tithianghlim tûr a ni.

12“Tin, Arona leh a fapate chu inbiakna puan in kawngka bula rawn hruaiin tuiin i sil tûr a ni. 13Arona chu silhfên thianghlimte chu i sintîr tûr a ni; tichuan, puithiam hna thawka ka tân rawng a bâwl theihna tûra hriak thihin, i tithianghlim tûr a ni. 14Tin, a fapate pawh rawn hruaiin kawr i haktîr tûr a ni. 15Puithiam hna thawka ka tân rawng an bâwl theihna tûrin, an pa hriak i thih ang khân anmahni chu hriak i thih tûr a ni; hriak thiha an awm hi, an thlahte thleng pawha kumkhuaa puithiam tûra ruat an ni reng tawh ang tih, an tân chhinchhiahna a ni ang,” tiin a sawi a. 16Chutiang chuan Mosian a ti a; Lalpantih tûra a pêk ang zawng zawng chuan a ti vek a.

17Tin, heti hi a ni a, a kum hnihna thla tîr ber, chumi thla ni khat ni tak chuan biakbûk chu an din ta a. 18Tin, Mosia chuan biakbûk chu a han din a, a nghahchhan ker kuakte a han rem a, a ban rem khâwmte chu a han din a, a bangrelte chu a han rawlh a, a bante chu a han tung a. 19Tin, biakbûk chungah chuan puan in a zâr a, chumi puan in chung chu a khuhnain a khuh leh a, Lalpan Mosia thu a pêk ang khân. 20Thuhriattîrna chu a la a, bâwm chhûngah a dah a, bâwmah chuan a zâwnfungte a rawlh a, bâwm chungah chuan zahngaihna ṭhutphah a dah a. 21Tin, bâwm chu biakbûk chhûngah chuan a dah a, a daidanna puanzâr chu a zâr a, thuhriattîrna bâwm chu a daidang ta a, Lalpan Mosia thu a pêk ang khân. 22Dawhkân chu inbiakna puan in chhûng, biakbûk hmar lampang, puanzâr pâwn lamah chuan a hûng a; 23dawhkânah chuan Lalpa hmaah chhang chu a dah fel diam a, Lalpan Mosia thu a pêk ang khân. 24Khâwnvâr dahna chu inbiakna puan in chhûng biakbûk chhim lampang dawhkân epah chuan a dah a; 25tin, khâwnvârte chu Lalpa hmaah chuan a dah a, LalpanMosia thu a pêk ang khân. 26Rangkachak maichâm chu inbiakna puan in chhûng puanzâr hmaah chuan a dah a; 27tin, a chungah chuan englo rimtui tak hâl tûr rimtui a hâl a; Lalpan Mosia thu a pêk ang khân.

28Biakbûk kawngka puanzâr a zâr a. 29Tin, inbiakna puan in biakbûk kawngka bulah chuan hâlrala thilhlanna maichâm a hûng a, a chungah chuan hâlral thilhlan leh ei tûr thilhlan a hlân a, Lalpan Mosia thu a pêk ang khân. 30Tin, maihûn chu inbiakna puan in leh maichâm inkârah chuan a hûng a, insilna tûrin tui a chhûng a; 31tin, Mosia leh Arona leh a fapate chuan chutah chuan an kut leh an kete an sil a. 32Inbiakna puan ina an luh dâwn leh maichâm bula an kal dâwnin an insil a ni, Lalpan Mosia thu a pêk ang khân. 33Tin, biakbûk leh maichâm vêl chuan hung chhûng kawtlai chu a siam a, a hung chhûng kawtlai kawngka puanzâr chu a zâr a. Chutichuan, Mosia chuan hna chu a zo ta a.

Lalpa chênna bûk chunga chhûm

(Num 9.15-23)

34Tichuan, inbiakna puan in chu chhûmin a rawn tuam ta mup a, biakbûk chu Lalpa ropuinain a lo khat ta a. 35Tin, chutia chhûm a lo zîn tâk mupa, Lalparopuinaa biakbûk chu a lo khah tâk avângin, Mosia chu inbiakna puan in chhûngah chuan a lût thei ta lo va. 36Tin, chhûm chuan biakbûk chu a kian chhohsan veleh Israela thlahte chu an insawn zêl a, an kalna tûr lama a kal chhûng zawng chuan. 37Chhûm chuan a kian chhohsan loh erawh chuan a kian chhohsan hma loh zawng insawn lovin an awm reng ṭhîn. 38Chhûnah chuan Lalpachhûm chu biakbûk chungah a zîng a, chutah chuan zânah mei a lo awm ṭhîn a, Israel-ho zawng zawng chuan an kalna tûr lama an kal chhûng zawng chuan chu chu an hmu zêl ṭhîn a ni.

EXODUS-39

Exodus 39 

Puithiam inthuamna tûr tah thu

(Ex 28.1-14)

1Tin, la dumpâwl te, a senduk te, a senlâr te hmangin hmun thianghlima rawngbâwlna tûra silhfên mawi takte an siam a; Arona tân silhfên thianghlimte an siam bawk a, Lalpan Mosia thu a pêk ang khân. 2Rangkachak zai te, la dumpâwl te, a senduk te, a senlâr te, la zai sîn tak kawpte hmangin puithiam kawr chu a siam a. 3Rangkachak chu pan takin an chhu pêr a, la dumpâwl te, a senduk te, a senlâr te, la zai sîn tak tea mi themthiam takin a zeh tûrin an zai thlûr seng a. 4A dârbak ṭhui belhbawmin an siam a; a hmâwr ve vea ṭhui belhbawm a ni. 5Tin, chumi kawr chunga kâwnghrên tûr themthiam taka tah chu, chumi kawr chi bawk tluan khat vek a ni a: rangkachak zai te, la dumpâwl te, a senduk te, a senlâr te, la zai sîn tak kawptea tah a ni, LalpanMosia thu a pêk ang khân.

6Tin, Israela thlahte hming ang zêlin, nemnaa ziak ang chuanna rangkachak zai phiara phûm onukion lungahte chuan an ziak a. 7Tin, Israela thlahte hriat rengna lung atân puithiam kawr dârbakah chuan a bel a, Lalpan Mosia thu a pêk ang khân.

Puithiam âwmbel siam thu

(Ex 28.15-30)

8Tin, âwmbel chu puithiam kawr siam ang bawk mi thiam tak siam angin rangkachak zai te, la dumpâwl te, a senduk te, a senlâr te, la zai sîn tak kawpte hmangin a siam a. 9Chu chu kil li nei a ni a, âwmbel chu an thuah a; a dung lam chu khâp a ni a, a vâng lam pawh khâp bawk a ni a, thuah a ni. 10Tin, chutah chuan lunghlute tlar liin an zep a: tlar khatna chu saridon te, topazio te, smaragdon te a ni a; 11tlar hnihna chu anthrax te, sappheiros te, sardonukion te a ni a; 12tlar thumna chu huakinthos te, akates te, amethustos te a ni a; 13tlar lina chu krusolithos te, berullion te, onukion te a ni a: rangkachak zai phiara phûm fel ṭhêt a ni. 14Tin, lung chu sâwm leh pahnih, Israela thlahte hming ang zêlin a ni a: hming nemnaa chuang ang, hnam tin an hming ang zêlin, hnam sâwm leh hnam hnihte tân chuan a ni. 15Tin, âwmbel chungah chuan hruihrual ang khaidiatte, rangkachak hlîr hlak herh an siam a. 16Rangkachak zai phiar pahnih leh rangkachak khâng pahnih an siam bawk a; tichuan, âwmbel tlâng hmâwr ve veah chuan khângte chu an vuah a. 17Tin, rangkachak khaidiat herh pahnih chu âwmbel tlâng hmâwr ve vea khâng pahnihah chuan an thlung a. 18Tin, khaidiat herh hmâwr lehlam pahnihte chu rangkachak zai phiar pahnihah chuan an zawm a, chu chu puithiam kawr hma lama dârbakah chuan an thlung a. 19Tin, rangkachak khâng pahnih an siam a, chûng chu âwmbel kil pahnih, puithiam kawr dep chhûng lampangah chuan an vuah a. 20Rangkachak khâng pahnih dang an siam leh a, chûng chu a hma lama puithiam kawr dârbakna pahnih hnuai lampang, a inzawmna lai vêl, puithiam kawr hrênna themthiam taka tah chung lamah chuan an vuah a. 21Tin, puithiam kawra khângahte chuan âwmbela khângte chu hrui dumpâwlin an chilh zawm a, themthiam taka tah puithiam kawr hrênna chung lama a awm theih nân leh, âwmbel chu puithiam kawr nên a inhran loh nân, Lalpan Mosia thu a pêk ang khân.

Puithiam inthuamna tûr dang siam thu

(Ex 28.31-43)

22Puithiam kawrfual, a dumpâwl hlîr hlaka tah a siam a; 23tin, kawrfual lai tak chu kawr bân bûl angin a tiâwng a, a âwng chu a thlêr chhiat theih mai lohna tûrin a tlâng vêl chu a chep a. 24Kawrfual fêmahte chuan pawmgranet lem - a dumpâwl te, a senduk te, a senlâr te, la zai kawptein an siam a. 25Tin, rangkachak hlîr hlak tengengte an siam a, chûng tengeng chu kawrfual fêmah a vêlin pawmgranet inkârahte chuan an dah a, pawmgranet inkâr zêlah an dah a ni: 26tengeng pakhat leh pawmgranet pakhat zêl kawrfual fêmah a vêlin rawngbâwlna tûra inthuam nân an dah a, Lalpan Mosia thu a pêk ang khân.

27Tin, Arona leh a fapate tân chuan la zai sîn taka tah kawrte an siam a, 28la zai sîn taka siam puithiam lukhum te, la zai sîn taka siam diar ṭha tak te, la zai sîn tak kawpa siam la zai sîn kekawr te, 29la zai sîn tak kawp te, a dumpâwl te, a senduk te, a senlârte hmanga puan zehmawi thiam taka zeh kawnghrên te nên, Lalpan Mosia thu a pêk ang khân.

30Tin, lukhum thianghlim atâna rangkachak phêk chu rangkachak hlîr hlakin an siam a, a pangah chuan hming nemna a chuang ang, “Lalpa PUAL” tih an chuantîr a. 31Tin, puithiam lukhum chung lama bel tûrin hrui dumpâwlin an thlung a, Lalpan Mosia thu a pêk ang khân.

An siam zo

(Ex 35.10-19)

32Chutichuan, inbiakna puan in biakbûk hna zawng zawng chu an zo ta a. Tichuan, Lalpan ti tûra Mosia thu a pêk ang chiah zêlin Israela thlahte chuan an ti a.

33Tin, Mosia hnênah biakbûk an rawn kalpui a, puan in te, a hmanrua zawng zawng te: a chilh behna te, a ban rem khâwm te, a bangrel te, a ban te, a nghahchhan ker kuak te nên; 34berâmpa vun chhum sena siam a khuhna te, savun ṭha mia siam a khuhna te, a daidanna tûr puanzâr te nên; 35thuhriattîrna bâwm leh a zâwnfung te, zahngaihna ṭhutphah nên; 36dawhkân te, a hmanrua zawng zawng te, chhangdah te nên; 37rangkachak hlîr hlaka siam khâwnvâr dahna te, a khâwnvâr, khâwnvâr dah tûr te, a hmanrua zawng zawng leh chhit ên atân a hriak nên; 38rangkachak maichâm te, hriak thih mi te, hâl tûr rimtui tak te, puan in kawngkaa zâr tûr puanzâr te nên; 39dâr maichâm te, a dâr lên te, a zâwnfung te, a hmanrua zawng zawng te, maihûn leh a hûnchhan te nên; 40biakbûk hung chhûng kawtlaia puanzâr te, a ban te, a ban nghahchhan ker kuak te, a hung chhûng kawngkaa puanzâr te, a hrui te, a kilh behna te, inbiakna puan in biakbûk chhûnga a hmanraw thil zawng zawng nên; 41hmun thianghlima rawngbâwlna tûra silhfên mawi taka tah te, puithiam Arona leh a fapaten puithiam hna an thawh huna an hâk tûr silhfên thianghlimte nên. 42Lalpan ti tûra Mosia thu a pêk ang zawng zawng chu Israela thlahte chuan an ti vek a. 43Tin, Mosian chûng hnathawh zawng zawng chu a han en a, ngai teh, an lo zo vek tawh a; Lalpathupêk ang takin an zo vek a ni. Tichuan, Mosian anni chu mal a sâwm a.

EXODUS-38

Exodus 38 

Hâlral thilhlanna tûr maichâm siam thu

(Ex 27.1-8)

1Thingri thingin hâlral thilhlan maichâm chu a siam a; a dung lam chu tawng nga a ni a, a vâng lam chu tawng nga a ni a, kil li a ni; a sân lam chu tawng thum a ni. 2A kil li chhîpahte chuan a kîte a siam a; chûng kîte chu maichâm nên a inzawm vek a; dâr tîin a luan vek a. 3Maichâm atâna hmanrua zawng zawng - bêl te, vutlawh te, maihûn te, sa thurna thîrkawm te, mei lâknate - a siam a; chûng hmanrua zawng zawngte chu dârin a siam a. 4Tin, maichâm dawhzâwl hnuai lam vêl chuan a chanve thlengin a siam a. 5Zâwnfungte rawlh nân dâr lên hungna kil lia vuah tûr khâng pali a chhûng a. 6Tin, zâwnfungte chu thingri thingin a siam a, dâr tîin a luan a. 7Tin, a zâwnna tûrin maichâm sîra khângahte chuan zâwnfungte chu a rawlh lût a; maichâm chu thingphela hungin a kawrawngin a siam a.

Dâr maihûn siam thu

(Ex 30.18)

8Dâr maihûn, a hûnchhan dâr nên, inbiakna puan in kawngka bula hmeichhe rawngbâwl ṭhînte dârthlalangin a siam a.

Lalpa chênna bûk hungna siam thu

(Ex 27.9-19)

9Tin, biakbûk hung chhûng kawtlai a siam a; chhim chhawng chhim lampanga a hung chhûng kawtlaia puanzâr zâr tûr chu, la zai sîn tak kawpa siam tawng zaa sei a ni. 10Chumi atân chuan ban sawmhnih leh dâr tlang ker kuak sawmhnih a awm a; bana a bânnate leh a zârfungte chu tangkarua a ni. 11Hmâr lampanga puanzâr zâr tûr chu tawng za a ni a, a bante chu sawmhnih leh dâr tlang ker kuak sawmhnih a ni a; bana a bânnate leh a zârfungte chu tangkarua a ni. 12Tin, thlang lampanga puanzâr zâr tûrte chu tawng sawmnga a ni a, a bante chu sâwm a ni a, a nghahchhan ker kuak chu sâwm a ni. 13Chhak chhawng chhak lampanga puanzâr zâr tûrte chu tawng sawmnga a ni. 14Kawngka sîr lehlama puanzâr zâr tûrte chu tawng sâwm leh tawng ngaa sei a ni a, a ban pathum leh a nghahchhan ker kuak pathum a ni a; 15a sîr lehlam panga mi pawh chutiang bawk chu a ni; biakbûk hung chhûng kawtlai kawngka sîr lehlam lehlama puanzâr zâr tûrte chu tawng sâwm leh tawng nga a ni; a bante chu pathum a ni a, a nghahchhan ker kuakte pawh pathum a ni. 16Biakbûk hung chhûng kawtlai vêla puanzâr zâr tûr zawng zawngte chu la zai sîn tak kawp vek a ni. 17A ban nghahchhan ker kuakte chu dâr a ni a, bana a bânnate leh a zârfungte chu tangkarua a ni a, a lubâwkte chu tangkaraw tîa luan a ni; tin, biakbûk hung chhûng kawtlai ban zawng zawng zârfungte chu tangkarua vek a ni. 18Biakbûk hung chhûng kawtlai kawngkaa puanzâr zâr tûr chu puan zehmawi thiam taka zeh a ni a, la zai sîn tak kawp te, a dumpâwl te, a senduk te, a senlârtea siam a ni. A sei lam chu tawng sawmhnih a ni a, a sân lam chu biakbûk hung chhûng kawtlai puanzâr zâr tûrte nêna induh chiah, tawng nga bawk a ni. 19Tin, a bante chu pali a ni a, a nghahchhan ker kuakte chu pali a ni a, dâr vek a ni; a bânnate chu tangkarua a ni a, a lubâwkte leh a zârfungte chu tangkaraw tîa luan a ni. 20Biakbûk leh a kawtlai hung chhûng kilh behna zawng zawngte chu dâr vek a ni.

Lalpa chênna bûk siamna atâna thil hman

21Biakbûk, thuhriattîrna biakbûk atâna hmanrua, Mosia thupêk anga puithiam Arona fapa Ithamara hova Levia chiten an chhiarte chu hêngte hi a ni. 22Juda hnama mi Hura fapa Uria, chu mi fapa Bezalela chuan Lalpan Mosia hnêna siam tûra thu a pêk zawng zawng kha a siam vek a. 23A hnênah chuan Dan hnama mi Ahisamaka fapa Oholiaba, englo ziak thiam, kut themthiam, la dumpâwl te, senduk te, senlâr te, la zai sîn tak te zehmawi thiamin a thawk ve a.

24Hmun thianghlim atâna hman ṭûl apianga rangkachak hman zawng zawng, rangkachak hlana chu talent sawmhnih leh pakua leh, hmun thianghlima sekel an pêk ṭhin anga chhiar chuan sekel zasarih leh sawmthum a ni. 25Tin, mipui chhiar tawhte zînga tel apiangte tangka pêk chu talent za leh, hmun thianghlima sekel an pêk ṭhin anga chhiar chuan, sekel sângkhat leh zasarih leh sawmsarih leh panga a ni: 26kum sawmhnih achin chung lam chhiar tawhte zînga tel tûra kal, nuai ruk leh sângthum leh zanga leh sawmngate chu, hmun thianghlima sekel pêk ṭhin anga chhiar chuan, beka khat ṭheuh (chu chu sekel chanve a ni) pe ang an ni. 27Tin, tangka talent za chu hmun thianghlim ban nghahchhan ker kuak leh, puan zârna ban nghahchhan ker kuak chhûn nân an hmang a; ban nghahchhan ker kuak za chhûn nân talent za an hmang a, ban nghahchhan pakhat chhûn nân talent khat zêl an hmang a ni. 28Tin, sekel sângkhat leh zasarih leh sawmsarih leh panga chu hmangin bana bânnate a siam a, lubâwkte chu tangkaraw tîin a luan a, a zârfungte a siam bawk a. 29Tin, an dâr hlante chu talent sawmsarih leh sekel sânghnih leh zali a ni. 30Tin, chûng chu inbiakna puan in kawngka ban nghahchhan ker kuakah te, dâr maichâmah te, a dâr lên leh maichâma hmanraw thil zawng zawngah te, 31biakbûk hung chhûng kawtlai vêl ban nghahchhan ker kuakah te, biakbûk hung chhûng kawngka ban nghahchhan ker kuakah te, biakbûk chilh behna zawng zawngah te a siam vek a.

EXODUS-37

Exodus 37 

Thuthlung bâwm siam thu

(Ex 25.10-22)

1Tin, Bezalela chuan thingri thingin bâwm chu a siam a; a dung lam chu tawng hnih leh a chanve a ni a, a vâng lam chu tawng khat leh a chanve a ni a, a sân lam chu tawng khat leh a chanve a ni. 2A chhûng leh a pâwn chu rangkachak hlîr hlak tîin a luan a, rangkachakin a tlâng a kâwm a. 3Tin, chumi a ke palia vuah atân chuan rangkachak khâng pali a chhûng a: khâng pahnih chu a lehlam atân a ni a, khâng pahnih chu a lehlam atân a ni. 4Tin, thingri thingin zâwnfungte a siam a, chûng chu rangkachak tîin a luan a. 5Tin, bâwm chu zâwn theih tûrin a panga khângah chuan zâwnfungte chu a rawlh a. 6Tin, rangkachak hlîr hlakin zahngaihna ṭhutphah a siam a; a dung lam chu tawng hnih leh a chanve a ni a, a vâng lam chu tawng khat leh a chanve a ni. 7Tin, cherub pahnih rangkachakin a siam a; zahngaihna ṭhutphah hmâwr ve vea mi chu a chherin a chher a: 8a hmâwr lehlamah cherub pakhat, a hmâwr lehlamah cherub pakhat. Zahngaihna ṭhutphah nêna inbelhbawm hlâwm vekin a hmâwr ve vea cherub-te chu a siam a. 9Tin, cherub-te chuan zahngaihna ṭhutphah chu an thlaa hliapin an thlate chu an zâr duai a. Inhmatawnin, zahngaihna ṭhutphah lam chu cherub-te chuan an hawi ve ve a.

Chhanghlan dahna dawhkân

(Ex 25.23-30)

10Tin, thingri thingin dâwhkân chu a siam a; a dung lam chu tawng hnih a ni a, a vâng lam chu tawng khat a ni a, a sân lam chu tawng khat leh a chanve a ni. 11Tin, chu chu rangkachak hlîr hlak tîin a luan a, rangkachakin a tlâng a kâwm a. 12Tin, kutphah bawka hlaiin a kâwm a siam a, chu chu rangkachakin a tlâng a kâwm leh a. 13Tin, chumi atân chuan rangkachak khâng pali a chhûng a, chumi khâng chu dawhkân ke pali kil ṭheuhvah chuan a vuah a. 14Dawhkân chu zâwna, a zâwnfung chu rawlh theih tûrin khângte chu a kâwm siin a vuah a. 15Tin, dawhkân chu zâwn nân zâwnfungte chu thingri thingin a siam a, rangkachak tîin a luan a. 16Tin, dawhkâna bungbêl - thlêng te, no te, a bun chhuahna tûr berhbu te, uain thâwlte chu - rangkachak hlîr hlakin a siam a.

Khâwnvâr dahna siam thu

(Ex 25.31-40)

17Khâwnvâr dahna chu rangkachak hlîr hlakin a siam a; chumi khâwnvâr dahna chu a ngul bul leh a ngul chu a chherin a chher a; a no te, a pârfung te, a pârte chu a inzawm vek a. 18A sîrahte chuan pêng paruk a lo pêng chhuak a: khâwnvâr dahna ngul sîr lehlamah chuan pêng pathum a awm a, khâwnvâr dahna ngul sîr lehlamah chuan pêng pathum a awm bawk a. 19A lehlam pang pêngah chuan vaiumkhal kuhmûm ang no pathum, a pârfung leh a pâr a siam a; tin, a lehlam pang pêngah pawh vaiumkhal kuhmûm ang no pathum, a pârfung leh a pâr a siam a; chutiang chuan khâwnvâr dahna pêng paruk atân a siam a. 20Tin, khâwnvâr dahna ngulah chuan no pali, vaiumkhal kuhmûm anga siam, a pârfung leh a pârte a awm a. 21Chumi inzawm vek pêng pahnih hnuaiah chuan pârfung hmasa ber a awm a, chumi inzawm vek pêng pahnih hnuaiah chuan pârfung dang a awm a, chumi inzawm vek pêng pahnih hnuaiah chuan pârfung dang a awm leh bawk a; khâwnvâr dahna ngula pêng parukah chuan a awm vek a ni. 22Chûng a pârfungte leh a pêngte chuan a zawm vek a; a pum chuan rangkachak hlîr hlaka chher a ni. 23Tin, chumi atân chuan khâwnvâr pasarih nên, chaichehte nên, meivâp dahnate nên rangkachak hlîr hlakin a siam a. 24Chumi khâwnvâr dahna leh a hmanrua tûr zawng zawng siam nân chuan rangkachak hlîr hlak talent khat a hmang a.

Rimtui hâlna tûr maichâm

(Ex 30.1-5)

25Tin, rimtui hâl nân thingri thingin maichâm a siam a. A dung lam chu tawng khat a ni a, a vâng lam chu tawng khat a ni a, kil li a ni; tin, a sân lam chu tawng hnih a ni. A kîte nên chuan a inzawm vek a ni. 26Tin, a chungte, a pang vêlte leh a kîte chu rangkachak hlîr hlak tîin a luan a; tin, rangkachakin a tlâng a kâwm a. 27Tin, a kotlâng hnuai lamah, a sîr tuakah chuan rangkachak khâng pahnih a siam a; chûng chu a zâwnfung rawlhna tûr a ni. 28Tin, thingri thing zâwnfungte a siam a, rangkachak tîin a luan a.

Hriak siam thu

(Ex 30.22-38)

29Hriak thih chi, hriak thianghlim leh englo rimtui tak hâl tûr rimtui fîm tak, rimtui siamtu siam angin a siam bawk a.

EXODUS-36

Exodus 36 

1“Tin, Bezalela leh Oholiaba leh mi themthiam tu pawh, Lalpan thu a pêk ang zêla hmun thianghlima rawngbâwlna hna tinrêng thawk thei tûra finna leh hriat thiamna a pêk apiangte chuan an bei tûr a ni,” a ti a.

Mipuiten thilpêk an rawn la ṭeuh

2Tin, Mosian Bezalela leh Oholiaba leh mi themthiamho, Lalpan an thinlunga finna a pêka, chumi hna bei peih tûra thinlung taka phûr sârh apiang chu a ko va. 3Tin, Israela thlahten hmun thianghlima rawngbâwl nâna thil siam tûra an rawn thawh zawng zawng chu Mosia hnên aṭangin an la zêl a. Tin, tûk tin duh thua thilhlante chu a hnênah an rawn hlân zêl bawk a. 4Tin, mi themthiamho zawng zawng, hmun thianghlim atâna hna tinrêng thawkte chuan an hnathawh lai chu an tlânsan ṭheuh va, 5Mosia hnênah, “Lalpansiam tûra thu a pêk siam nân mite chuan a chuang a liamin thil an rawn la e,” tiin an thlen a. 6Tin, Mosia chuan thu a pe a, “Hmun thianghlim atâna thil pêk tûr chu a hmei a pa, tu mahin rawn buatsaih tawh suh se,” tiin an riahhmunah chuan an tlângautîr ta a. Chutichuan, mite chuan an rawn lâk phal a ni ta lo va. 7An neih sa chu siam ṭûl apiang siamna tûr chuan a tâwk hle mai a, a tam lutuk mah a ni.

Lalpa chênna biakbûk sak thu

(Ex 26.1-37)

8Tin, an zînga mi themthiam hnathawkho zawng zawngte chuan biakbûk chu puanzâr sâwm neiin an siam a; chûng puanzârte chu lazai sîn tak kawp te, dumpâwl te, senduk te, senlâr te hmangin cherub lemte mi thiam tak siam chuantîrin a siam a. 9Puanzâr chu a sei lam tawng sawmhnih leh tawng riat ṭheuh a ni a, puanzâr chu a hlai lam tawng li ṭheuh a ni; puanzâr zawng zawng chu a inchen vek a. 10Tin, puanzâr pangate chu a zawm vek a, puanzâr panga dangte pawh chu a zawm bawk a. 11Tin, puanzâr zawm khat hmâwrtawng ber tlângah chuan a beng a dumpâwlin a siam a; chutiang bawkin puanzâr zawm lehlam hmâwrtawng ber tlângah chuan a siam bawk a. 12Puanzâr pakhatah chuan beng sawmnga a siam a, puanzâr zawm khat tlângah pawh chuan beng sawmnga a siam bawk a; chûng bengte chu a inep thliah a.

13Tin, rangkachak chilh behna sawmnga a siam a, a chilh behnate chuan puanzârte chu a chilh bet a; tichuan, biakbûk chu pindan pakhat a lo ni ta a. 14Tin, biakbûk chung khuh nân kêl hmul puanzârte a siam a; puanzâr sâwm leh pakhat a siam a. 15Puanzâr chu a sei lam tawng sawmthum ṭheuh a ni a, puanzâr chu a hlai lam tawng li ṭheuh a ni; puanzâr sâwm leh pakhatte chu a inchen vek a. 16Puanzâr pangate chu a ṭhui zawm vek a, puanzâr paruk pawh chu a ṭhui zawm vek a. 17Tin, puanzâr zawm khat hmâwrtawng ber tlângah chuan beng sawmnga a siam a, puanzâr zawm lehlam tlângah chuan beng sawmnga a siam bawk a. 18Tin, puan in chu pindan pakhat a lo nih theih nân a chilh zawmna tûrin dâr chilh behna sawmnga a siam a. 19Tin, berâmpa vun chhum senin puan in chung khuhna te, savun ṭha miin a chunga khuh lehna te a siam a.

20Tin, biakbûk ban rem khâwm tûrte chu ngîl taka dingin thingri thingin a siam a. 21Ban rem khâwm sei lam chu tawng sâwm a ni a, a vâng lam chu tawng khat leh a chanve ṭheuh a ni. 22Ban rem khâwm tinah chuan ke pahnih inzawmin a awm a. Chutiang chuan biakbûk ban rem khâwm zawng zawng chu a siam a. 23Tin, biakbûk atân chuan ban rem khâwmte a siam a, chhim chhawng chhim lampang atân chuan ban rem khâwm sawmhnih a siam a. 24Tin, chumi ban rem khâwm sawmhnih nghahchhan atân chuan tangkaraw tlang ker kuak sawmli a siam a: a ke pahnih atân ban rem khâwm pakhat nghahchhan ker kuak pahnih leh, a ke pahnih atân ban rem khâwm dang pakhat nghahchhan ker kuak pahnih a siam a. 25Tin, biakbûk sîr lehlam hmâr chhawng lam atân chuan ban rem khâwm sawmhnih a siam a, 26tangkaraw tlang ker kuak sawmli nên: ban rem khâwm pakhat atân nghahchhan ker kuak pahnih a siam a. 27Tin, biakbûk kawmchâr khawthlang chhawng lam atân chuan ban rem khâwm paruk a siam a, 28Tin, biakbûk kawmchâr kil ve ve atân chuan ban rem khâwm pahnih a siam a. 29Tin, a hnuai lamah chuan thlawp a ni a, chutiang bawkin a chhîp lam khâng hmasa ber thlengin thlawp a ni. A kil pahnihah chuan chutiang chuan a ti ve ve a. 30Tin, ban rem khâwm pariat, a nghahchhan tûr tangkaraw tlang ker kuak sâwm leh paruk nên a awm a, ban rem khâwm tin innghah nân ker kuak pahnih zêl a awm a ni. 31Tin, thingri thingin bangrel: biakbûk bang lehlam ban rem khâwm atân panga, 32biakbûk bang lehlam ban rem khâwm atân panga, biakbûk kawmchâr khawthlang chhawng lam ban rem khâwm atân pawh panga a siam a. 33Tin, bangrel laita, ban rem khâwm lai taka mi chu ban rem khâwm hmâwrtawng ber aṭangin, a lehlam hmâwrtawng ber thlenga thil tlang tûrin a siam a. 34Ban rem khâwmte chu rangkachak tîin a luan a, bangrelte thil nân rangkachak khângte a siam a; tin, chûng bangrelte chu rangkachak tîin a luan a.

35Tin, puanzâr tûr chu lazai sîn tak kawp te, a dumpâwl te, a senduk te, a senlâr te hmangin cherub lemte mi thiam tak siam chuantîrin a siam a. 36Tin, chumi atân chuan thingri ban pali a siam a, chûng chu rangkachak tîin a luan a, a bânnate chu rangkachak a ni; tin, chûng nghahchhan atân chuan tangkaraw tlang ker kuak pali a chhûng a. 37Tin, puan in kawngkaa zâr tûr lazai sîn tak kawp te, a dumpâwl te, a senduk te, a senlârte hmangin, puan zeh mawi thiam tak zeh nên a siam a; 38tin, chumi zârna tûr ban panga, a bânnate nên a siam a. Tin, ban lubâwkte leh a zârfungte chu rangkachak tîin a luan a; mahse, chûng nghahchhan ker kuak pangate chu dâr a ni a.

EXODUS-35

Exodus 35 

Sabbath chungchânga dân

1Tin, Mosian Israela thlah pung khâwmho zawng zawngte chu a ko khâwm a, an hnênah, “Hêng hi a nih hi Lalpan in tih tûra thu a pêk che u chu: 2Ni ruk chhûng hna thawh nân hman tûr a ni a, a ni sarih ni erawh chu in tân ni thianghlim, Lalpa tâna chawlh dêrna Chawlhni a ni tûr a ni: tu pawh chumi nia hna thawk apiang chu tihhlum tûr a ni ang. 3Chawlhni chuan in chênna hmun rêng rêngahte chuan mei in chhêm tûr a ni lo,” a ti a.

Biakbûk tâna thilpêk

(Ex 25.1-9)

4Tin, Mosian Israela thlahte pung khâwmho zawng zawng hnênah chuan, “Hei hi a nih hi Lalpan thu a pêk che u chu: 5‘In zîng ata Lalpa tâna thilhlan tûr rawn la rawh u. Tu pawhin a thinlunga pêk châk apiang chuan Lalpa tân hlan tûr chu rawn la rawh se: rangkachak te, tangkarua te, dâr te, 6la dumpâwl te, senduk te, senlâr te, lazai sîn te, kêl hmul te nên; 7tin, berâmpa vun chhum sen te, savun ṭha mi te, thingri thingte nên; 8tin, khâwnvâr atân hriak te, hriak thih mi atân leh hâl tûr rimtui tak atân englo rimtui nên; 9tin, puithiam kawr leh kawr âwma zeh tûrin onukion lungte leh lunghlute nên.

Lalpa chênna biakbûk tâna hman tûr thilte

(Ex 39.32-43)

10“ ‘Tin, in zînga mi themthiam apiang chu lo kal sela, Lalpan siam tûra thu a pêk apiang chu siam rawh se: 11biakbûk te, a puan in te, a khuhna te, a chilh behna te, a ban rem khâwm te, a bangrel te, a ban te, a nghahchhan ker kuakte nên; 12bâwm leh a zâwnfung te, zahngaihna ṭhutphah te, a daidanna tûr puanzâr nên; 13dawhkân leh a zâwnfung te leh a hmanrua zawng zawng te, chhangdah te nên; 14tin, êng atân khâwnvâr dahna te leh a hmanrua zawng zawng te, a khâwnvâr te, chhit ên atân hriak te nên; 15tin, rimtui hâlna maichâm leh a zâwnfung te, hriak thih mi te, hâl tûr rimtui tak te, biakbûk kawngkaa zâr tûr kawngka puanzâr te nên; 16hâlrala thilhlanna maichâm, a dâr lên leh a zâwnfungte leh a hmanrua zawng zawng te, maihûn leh a hûnchhan te nên; 17biakbûk hung chhûng kawtlaia puanzâr te, a ban te, a ban nghahchhan ker kuak te leh a hung chhûng kawngkaa puanzâr te nên; 18biakbûk kilh behna te, a hung chhûng kawtlai kilh behna te, a hrui te nên; 19hmun thianghlima rawngbâwlna tûra silhfên mawi taka tah te, puithiam hna an thawh huna hâk tûr puithiam Arona silhfên thianghlim leh a fapate silhfênte,’ tiin,” a ti a.

Mipuiten an thilpêk an rawn la khâwm

20Tichuan, Israela thlah pung khâwmho zawng zawngte chu Mosia hnên ata an ṭîn ta vek a. 21Tin, mi tin thinlung taka phûr sârh apiang leh rilru taka phal apiang chu an lo kal a, inbiakna puan ina hman tûr leh, rawngbâwlna lam atâna thil hman ṭûl apiang leh, silhfên thianghlim tûr chu Lalpa tân an rawn thawh hlawm a. 22A hmei a pain pêk châk apiangte chu an lo kal a, banbun te, bengbeh te, hming nemna zungbun te, ṭhi te, rangkachak incheina tinrêngte an rawn la a; mi tin rangkachak hlan tûr nei apiangin Lalpa tân an hlân ṭheuh va. 23Tin, mi tin la dumpâwl te, senduk te, senlâr te, lazai sîn te, kêl hmul te, berâmpa vun chhum sen te, savun ṭha mi te nei apiangin an rawn keng hlawm a. 24Mi tin tangkarua leh dârte thawh apiangin Lalpa tâna thilhlan tûr an rawn keng a. Tin, mi tin thingri thing, hmanraw tinrêng atâna hman tlâk nei apiangin an rawn la a. 25Tin, hmeichhe themthiamho zawng zawngte chuan la an kai a, chûng an la kaih dumpâwl te, senduk te, senlâr te, lazai sîn te chu an rawn keng hlawm a. 26Tin, hmeichhe themthiam phûr sârhho zawng zawngte pawhin kêl hmul an kai a. 27Tin, puithiam kawr leh kawr âwma zeh tûrin rorêltuten onukion lungte leh lunghlute an rawn keng a; 28tin, chhit ên atân te, hriak thih mi atân te, hâl tûr rimtui tak atân hriak leh rimtuite pawh. 29Israela thlahte chuan Lalpa hnênah duh thua thilhlan an rawn hlân a; mi tin, a hmei a pa, Lalpan Mosia kuta thil siam tûra thu a pêk zawng zawngte siamna tûra thinlunga châk taka kengtute chuan.

Lalpa chênna bûk siam tûr mi themthiam

(Ex 31.1-11)

30Tin, Mosian Israela thlahte hnênah chuan, “Ngai teh u, Lalpan Juda hnama mi Hura fapa Uria, chu mi fapa Bezalela chu a thlang tawh e. 31Chu mi chu finna te, hriat thiamna te, hriatna te, kawng tinrênga themthiamna te nei tûrin Pathian Thlarauvin a tikhat tawh a, 32thiltih tûr fing taka suangtuah thiamna te, rangkachak leh tangkarua leh dâr chher thiamna te, 33lunghlute zeh tûra phel thiamna te, thing zai mawi dân thiamna te, kawng tinrênga themthiamna te nei tûrin. 34Tin, amah nên, Dan hnama mi Ahisamaka fapa Oholiaba nên mite zirtîr theihna finna a pe ve ve a. 35Anni chu kawng tinrênga themthiamna te, englo ziak thiamna te, themthiamna te, la dumpâwl te, senduk te, senlâr te, lazai sîn te zeh mawi thiamna te, puan tah thiamna te, hnathawh tinrêng thiamna te, thiltih tûr fing taka suangtuah thiamna te nei tûrin thinlung finnain a tikhat tawh e.