Thuthlung bâwm siam thu

(Ex 25.10-22)
1Tin, Bezalela chuan thingri thingin bâwm chu a siam a; a dung lam chu tawng hnih leh a chanve a ni a, a vâng lam chu tawng khat leh a chanve a ni a, a sân lam chu tawng khat leh a chanve a ni. 2A chhûng leh a pâwn chu rangkachak hlîr hlak tîin a luan a, rangkachakin a tlâng a kâwm a. 3Tin, chumi a ke palia vuah atân chuan rangkachak khâng pali a chhûng a: khâng pahnih chu a lehlam atân a ni a, khâng pahnih chu a lehlam atân a ni. 4Tin, thingri thingin zâwnfungte a siam a, chûng chu rangkachak tîin a luan a. 5Tin, bâwm chu zâwn theih tûrin a panga khângah chuan zâwnfungte chu a rawlh a. 6Tin, rangkachak hlîr hlakin zahngaihna ṭhutphah a siam a; a dung lam chu tawng hnih leh a chanve a ni a, a vâng lam chu tawng khat leh a chanve a ni. 7Tin, cherub pahnih rangkachakin a siam a; zahngaihna ṭhutphah hmâwr ve vea mi chu a chherin a chher a: 8a hmâwr lehlamah cherub pakhat, a hmâwr lehlamah cherub pakhat. Zahngaihna ṭhutphah nêna inbelhbawm hlâwm vekin a hmâwr ve vea cherub-te chu a siam a. 9Tin, cherub-te chuan zahngaihna ṭhutphah chu an thlaa hliapin an thlate chu an zâr duai a. Inhmatawnin, zahngaihna ṭhutphah lam chu cherub-te chuan an hawi ve ve a.

Chhanghlan dahna dawhkân

(Ex 25.23-30)
10Tin, thingri thingin dâwhkân chu a siam a; a dung lam chu tawng hnih a ni a, a vâng lam chu tawng khat a ni a, a sân lam chu tawng khat leh a chanve a ni. 11Tin, chu chu rangkachak hlîr hlak tîin a luan a, rangkachakin a tlâng a kâwm a. 12Tin, kutphah bawka hlaiin a kâwm a siam a, chu chu rangkachakin a tlâng a kâwm leh a. 13Tin, chumi atân chuan rangkachak khâng pali a chhûng a, chumi khâng chu dawhkân ke pali kil ṭheuhvah chuan a vuah a. 14Dawhkân chu zâwna, a zâwnfung chu rawlh theih tûrin khângte chu a kâwm siin a vuah a. 15Tin, dawhkân chu zâwn nân zâwnfungte chu thingri thingin a siam a, rangkachak tîin a luan a. 16Tin, dawhkâna bungbêl - thlêng te, no te, a bun chhuahna tûr berhbu te, uain thâwlte chu - rangkachak hlîr hlakin a siam a.

Khâwnvâr dahna siam thu

(Ex 25.31-40)
17Khâwnvâr dahna chu rangkachak hlîr hlakin a siam a; chumi khâwnvâr dahna chu a ngul bul leh a ngul chu a chherin a chher a; a no te, a pârfung te, a pârte chu a inzawm vek a. 18A sîrahte chuan pêng paruk a lo pêng chhuak a: khâwnvâr dahna ngul sîr lehlamah chuan pêng pathum a awm a, khâwnvâr dahna ngul sîr lehlamah chuan pêng pathum a awm bawk a. 19A lehlam pang pêngah chuan vaiumkhal kuhmûm ang no pathum, a pârfung leh a pâr a siam a; tin, a lehlam pang pêngah pawh vaiumkhal kuhmûm ang no pathum, a pârfung leh a pâr a siam a; chutiang chuan khâwnvâr dahna pêng paruk atân a siam a. 20Tin, khâwnvâr dahna ngulah chuan no pali, vaiumkhal kuhmûm anga siam, a pârfung leh a pârte a awm a. 21Chumi inzawm vek pêng pahnih hnuaiah chuan pârfung hmasa ber a awm a, chumi inzawm vek pêng pahnih hnuaiah chuan pârfung dang a awm a, chumi inzawm vek pêng pahnih hnuaiah chuan pârfung dang a awm leh bawk a; khâwnvâr dahna ngula pêng parukah chuan a awm vek a ni. 22Chûng a pârfungte leh a pêngte chuan a zawm vek a; a pum chuan rangkachak hlîr hlaka chher a ni. 23Tin, chumi atân chuan khâwnvâr pasarih nên, chaichehte nên, meivâp dahnate nên rangkachak hlîr hlakin a siam a. 24Chumi khâwnvâr dahna leh a hmanrua tûr zawng zawng siam nân chuan rangkachak hlîr hlak talent khat a hmang a.

Rimtui hâlna tûr maichâm

(Ex 30.1-5)
25Tin, rimtui hâl nân thingri thingin maichâm a siam a. A dung lam chu tawng khat a ni a, a vâng lam chu tawng khat a ni a, kil li a ni; tin, a sân lam chu tawng hnih a ni. A kîte nên chuan a inzawm vek a ni. 26Tin, a chungte, a pang vêlte leh a kîte chu rangkachak hlîr hlak tîin a luan a; tin, rangkachakin a tlâng a kâwm a. 27Tin, a kotlâng hnuai lamah, a sîr tuakah chuan rangkachak khâng pahnih a siam a; chûng chu a zâwnfung rawlhna tûr a ni. 28Tin, thingri thing zâwnfungte a siam a, rangkachak tîin a luan a.

Hriak siam thu

(Ex 30.22-38)
29Hriak thih chi, hriak thianghlim leh englo rimtui tak hâl tûr rimtui fîm tak, rimtui siamtu siam angin a siam bawk a.