Davidan Keila khua a chhan

1Tin, “Ngai teh, Philistia mite chuan Keila khua an bei a, hruiha buhte chu an lâksak vek mai,” tih Davida chu an hrilh a. 2Tichuan, Davida chuan Lalpa chu, “Chûng Philistia mite chu ka zuk bei ang em?” tiin a râwn a. Tin, Lalpa chuan Davida hnênah, “Philistia mite chu zuk bei la, Keila khua chu zuk humhim rawh,” a ti a. 3Tin, Davida mite chuan a hnênah, “Ngai teh, Judai rama awm chung pawh hian kan hlau a ni a, Keila khuaa zuk kala Philistia sipaite zuk beih chu a va hlauhawm lehzual âwm ve!” an ti a. 4Chutichuan, Davida chuan Lalpa chu a râwn leh a. Tin, Lalpa chuan a chhâng a, a hnênah, “Tho la, Keila khuaah chhuk rawh, Philistia mite chu i kutah ka pe ang e,” a ti a. 5Chutichuan, Davida leh a mite chu Keila khuaah an kal a, Philistia mite chu an zuk bei a, an rante chu an lâksak a, an that chiam a. Chutiang chuan Davidan Keila khuaa mite chu a humhim ta a.
6Tin, heti hi a ni a, Ahimeleka fapa Abiathara Keila khuaa Davida hnêna a tlân lai khân puithiam kawr kenga chhuk thla a ni a. 7Tin, Keila khuaah Davida chu a kal tih Saula an hrilh a. Saula chuan, “Pathianin ka kutah a pe ta a nih chu; kulh kawngka leh a kalhna nei khuaah chuan lûtin a inkhung ta si a,” a ti a. 8Tin, Saula chuan mi zawng zawng chu indo tûrin, Keila khua zuk beia Davida leh a mite zuk hual tûrin a ko khâwm a.
9Tin, Davida chuan Saulan a chungah thil ṭha lo a suangtuah tih chu a lo hria a, puithiam Abiathara hnênah chuan, “Puithiam kawr kha han la teh khai,” a ti a. 10Chutichuan, Davida chuan, “Aw Lalpa, Israel-te Pathian, Saula chuan keimah avângin khua chu tichhe tûrin Keila khuaah chuan lo chhuk a tum tih i chhiahhlawh hian ka hre tlat a. 11Keila khuaa mite hian a kutah min pe ang em? I chhiahhlawhin ka lo hriat ang chuan Saula chu a lo chhuk dâwn em? Aw Lalpa, Israel-te Pathian, khawngaih takin i chhiahhlawh hi mi hrilh ang che,” a ti a. Tin, Lalpa chuan, “A lo chhuk dâwn,” a ti a. 12Chutichuan, Davida chuan, “Keila khuaa mite chuan kei leh ka mite hi Saula kutah min pe ang em?” a ti a. Tin, Lalpa chuan, “An pe ang che,” a ti a. 13Chutichuan, Davida leh a mite, zaruk emaw lai chu an tho va, Keila khua ata chu an chhuak a, kalna remchâng lai apiangah chuan an kal ta a. Tin, Davida chu Keila khua ata a tlân chhuak ta tih Saula an hrilh a; tichuan, thawh chhuah a ṭhulh ta a.

Tlâng ramah Davida a inkulh

14Tin, Davida chu thlalêrah, kulhbîngahte a awm a, Ziph thlalêra tlâng ramah a awm ta reng a. Tin, Saula chuan amah chu ni tin a zawng a; nimahsela, Pathianin a kutah a pe lo va.
15Tin, Davida chuan amah tihhlum tumin Saula chu a lo thawk tih a hria a; tichuan, Davida chu Ziph thlalêr ramhnuaiah a awm a. 16Tin, Saula fapa Jonathana chu a tho va, ramhnuaiah Davida hnênah chuan a kal a, Pathianah a kut a tihchaksak a. 17Tin, a hnênah, “Hlau hauh suh, ka pa Saula kut chuan a zawng chhuak lo vang che. Israel-te lalah i awm ang a, kei i dawttu ka ni ang; chu pawh chu ka pa Saula hian a hre reng a ni,” a ti a. 18Tin, an pahnih chuan Lalpa hmaah thu an thlung a; tin, Davida chu ramhnuaiah a awm reng a, Jonathana chu a in lamah a haw ta a.
19Chutichuan, Ziph mite chu Gibea-ah Saula hnênah an han chho va, “Davida chu kan hnênah ramhnuai kulhbîngah, thlalêr chhim lampang Hakila tlângah a biru reng a ni lâwm ni? 20Chuvângin, aw lalpa, i nunnain lo chhuk a duhthusâm ang ngei chuan lo chhuk tawh la; tin, keini lo tih ve tûr chu lal kuta amah lo hlan chu a ni ang,” an ti a. 21Tin, Saula chuan, “Lalpa chuan malsâwm che u rawh se; nangniho chuan mi khawngaih hle a ni. 22Kal ula, va chian lehzual ula, hnuhma va chhui ula, chutah a hmutu pawh va chian fel leh tê tê rawh u; fing vervêk takin thil a ti ṭhîn tih miin min hrilh a ni. 23Chuvângin, a bihrûkna hmun zawng zawngte hre diam vek ula; tin, ka hnênah lo kal leh ngei ngei ula; tichuan, in hnênah ka kal ve dâwn nia. Tin, heti hi a ni ang a, he rama a awm phawt chuan Juda mi sâng tam tak zîng ata chu ka zawng chhuak ang,” a ti a.
24Tin, an tho va, Saula kal hmain Ziph-ah chuan an kal ta a. Nimahsela, Davida leh a mite chu thlalêr chhim lam Araba-ah Maon thlalêrah chuan an awm a. 25Saula leh a mite chuan an zawng ṭan ta a; chu thu chu Davida an hrilh chuan Maon thlalêr lungpui pan chuan a chhuak a, chutah chuan a awm ta reng a. 26Saula chu tlâng lehlam pangah a kal a; Davida leh a mite chu tlâng lehlam pangah chuan Saula hlauvin hmanhmawh takin an kal bawk a. Saula leh a mite chuan Davida leh a mite chu an man teuh tawh hle a. 27Nimahsela, Saula hnênah chuan, “Hmanhmawh la, lo kal rawh, Philistia mite chuan kan ram an rawn bei a ni,” tiin zualko a lo thleng a. 28Chutichuan, Saula chuan Davida a ûm chu a kîrsan a, Philistia mite bei tûr chuan a kal ta a; chuvângin, chumi hmun chu Sela-hamalekoth an ti ta a. 29Tin, Davida chu chuta ta chu a chho va. En-gedi kulhbîngahte chuan a awm ta a.