Isua an phiar

(Mk 14.1-2; Lk 22.1-2; Joh 11.45-53)
1Tin, heti hi a ni a, Isuan chûng thu zawng zawng chu a sawi zawh chuan a zirtîrte hnênah, 2“Ni hnih achinah kalhlên kût a lo awm dâwn tih in hria a, Mihring Fapa hi khen beh tûrin an mantîr dâwn a ni,” a ti a.
3Chumi lai chuan, puithiam lalber Kaiapha an tiha in hual chhûng kawtlaiah chuan puithiam lalte leh vântlâng upate chu an inkhâwm a; 4Isua chu ngamthlêma mana, an tihhlum theihna tûrin an inrâwn a. 5Nimahsela, “Kût chhûng chuan ni suh se; chuti lo chuan, vântlâng zîngah buaina a lo awm dah ang e,” an ti a.

Bethani-ah Isua hriak thih

(Mk 14.3-9; Joh 12.1-8)
6Tin, Isua chu Bethani khuaah, phâr Simona ina a awm laiin, 7hmeichhe pakhat alabasta bâwma hriak rimtui to tak kengin a hnênah a lo kal a, a chaw kîl laiin a luah a leih a. 8Nimahsela, zirtîrte chuan chu chu an hmuhin an thinur a, “Eng atân nge hetia a tihboral mai mai ni? 9He hriak hi man tam taka hralha, mi retheite hnênah pêk theih a ni si a,” an ti a. 10Isua erawh chuan chu chu a hriatin an hnênah, “Hmeichhia hi engah nge in tihbuai ni? Ka chungah hian thil ṭha tak a ti a ni. 11Mi retheite chu kumkhuaa in hnêna awm an ni alâwm, kei erawh chu kumkhuaa in hnêna awm tûr ka ni lo. 12He hriak rimtui ka taksaa a leih hi, phûm tûra mi buatsaih tûrin a ti a nih hi. 13Tihtakmeuhvin ka hrilh a che u, khawvêl zawng zawngah, khawiah pawh he Chanchin Ṭha hi an hrilna apiangah, he hmeichhe thiltih pawh hi amah hriat rengna tûrin an sawi ve zêl ang,” a ti a.

Judan Isua mantîr a remti

(Mk 14.10-11; Lk 22.3-6)
14Chumi hnuah chuan sâwm leh pahnihte zînga mi pakhat, Juda Iskariota an tiha chu puithiam lalte hnênah a kal a. 15“Amah chu ka mantîr ang che u a, eng nge mi pêk ang?” a ti a. Tin, tangka sawmthum an bûksak ta a. 16Chumi chinah chuan mantîrna remchâng a zawng ta a.

A zirtîrte nên kalhlên kût chaw

(Mk 14.12-21; Lk 22.7-14, 21-23; Joh 13.21-30)
17Tin, chhang dawidim telh loh ni, ni hmasa berah chuan zirtîrte chu Isua hnênah an lo kal a, “Kalhlên kût chaw eina tûrin khawiah nge buatsaihsak che ila i duh?” an ti a. 18Tin, ani chuan, “Khawpuiah tu emaw hnênah kal ula, a hnênah, ‘Zirtîrtu chuan, “Ka hun a hnai ta a; ka zirtîrte nên Kalhlên Kût i inah kan kût ang e,” a ti e,’ va ti ang che u,” a ti a. 19Tin, Isuan an hnêna a tih angin zirtîrte chuan an ti a; kalhlên kût chaw chu an buatsaih ta a.
20Tin, khua a lo tlai lam chuan zirtîr sâwm leh pahnihte nên chaw an kîl a; 21tin, an ei laiin ani chuan, “Tihtakmeuhvin ka hrilh a che u, in zînga mi pakhat hian mi mantîr ang,” a ti a. 22Tin, an lungngai ta êm êm a, a hnênah, “Lalpa, keimah em ni?” an ti ta ṭheuh va. 23Tin, ani chuan, “Thlêng mi zenpuitu ngei chuan mi mantîr ang. 24Mihring Fapa hi a chanchin an ziak ang tak khân a kal dâwn a ni; nimahsela, Mihring Fapa mantîrtu tûr mihring chung chu a pik e! Chu mihring chu piang suh sela a tân a ṭha zâwk ang,” tiin a chhâng a. 25Tin, a mantîrtu tûr Juda chuan a chhâng a, “Rabbi, keimah em ni?” a ti a. Ani chuan a hnênah, “Ni e,” a ti a.

Lalpa Zanriah

(Mk 14.22-25; Lk 22.14-20; 1 Kor 11.23-25)
26Tin, an ei laiin Isuan chhang a la a, mal a sâwmsak a, a phel a; tin, zirtîrte hnênah chuan a pe a, “La ula, ei rawh u; hei hi ka taksa a ni,” a ti a. 27Tin, no a la a, lâwm thu a sawi a, an hnênah a pe a, “In zain in rawh u; 28hei hi ka thisen, sualte ngaihdam nâna mi tam tak tâna chhuak tûr, thuthlunna chu a ni. 29Nimahsela, ka hrilh a che u, ka Pa ramah nangmahni nêna a thar ka in ni a thlen hma loh zawng, tûn achinah grêp hrui raha mi hi ka in leh tawh lo vang,” a ti a.
30Tin, hla an sak zawhin an chhuak a, Olive tlângah chuan an kal ta a.

Peteran Isua a phat tûr thu

(Mk 14.27-31; Lk 22.31-34; Joh 13.36-38)
31Tin, Isuan an hnênah, “Zâninah hian in zain ka chungthuah lungni lovin in awm vek ang; ‘Berâm vêngtu chu ka vua ang a, berâm rual chu an darh ang,’ tih ziak a ni si a. 32Nimahsela, ka thawhleh hnuah Galili ramah in hmaah ka kal ang,” a ti a.33Petera erawh chuan a hnênah, “An zain i chungthuah lungni lovin awm mah sela, kei zawng lungni lovin ka awm tawp lo vang,” tiin a chhâng a. 34Isuan a hnênah, “Tihtakmeuhvin ka hrilh a che, zâninah hian âr a khuan hmain nangin vawi thum mi phat ang,” a ti a. 35Peteran a hnênah, “I thihnaah chuan thi ve dâwn mah ila, ka phat tawp lo vang che,” a ti a. Chutiang bawk chuan zirtîrte zawng zawng chuan an ti ta ṭheuh va.

Gethsemane huana Isua ṭawngṭai

(Mk 14.32-42; Lk 22.39-46)
36Chumi zawhah chuan, Isua chu anniho nên hmun pakhat Gethsemane an tih chu an thleng a; tin, ani chuan a zirtîrte hnênah, “Sawta ka va ṭawngṭai chhûng zawng hetah hian lo ṭhu rawh u,” a ti a. 37Tin, Petera leh Zebedaia fapate pahnih chu a hruai a, a lungngaiin a lo mangang ta êm êm a. 38Tin, an hnênah, “Ka rilru a lungngai êm êm a, thihna khawp hial a ni; hetah hian awm ula, mi vênpui rawh u,” a ti a. 39Tin, tlêmin hma lamah a va kal hlek a, a bawkkhup a, “Aw ka Pa, a theih chuan he no hian mi pêl lul rawh se; nimahsela, keima thu ni lovin, nangma thu thu ni zâwk rawh se,” tiin a ṭawngṭai a.
40Tin, zirtîrte hnênah chuan a lo kal a, anni chu muhîlin a rawn hmu a; tichuan Petera hnênah, “E khai! Nangin dârkâr khat pawh mi vênpui thei lo a ni maw? 41Thlêmnaa in luh loh nân inring rengin ṭawngṭai rawh u; thlarau zawngin a peih a, tisa erawh chu a chak lo a ni,” a ti a. 42Tin, vawi hnihnaah a va kal a, a ṭawngṭai leh a, “Aw ka Pa, ka in lohva hei hian mi pelh theih lul loh chuan, nangma thu thu ni rawh se,” a ti a. 43Tin, a lo kal leh a, anniho chu muhîlin a rawn hmu leh a, an mut a chhuak hle si a. 44Tin, a kalsan leh a, a vawi thumnaah a thusawi ngai sawiin a ṭawngṭai leh a. 45Chumi zawhah chuan zirtîrte hnênah a lo kal leh a, an hnênah, “Tûnah zawng muhîl ula, châwl tawh rawh u! Ngai teh u, a hun chu a lo thleng ta a, Mihring Fapa hi mi sualte kutah an mantîr dâwn hi. 46Tho ula, i kal ang u; en teh u, mi mantîrtu tûr chu a lo hnaih tâk hi,” a ti a.

Isua an man

(Mk 14.43-50; Lk 22.47-53; Joh 18.3-12)
47Tin, a la sawi lai mêkin Juda, sâwm leh pahnihte zînga mi pakhat chu a lo thleng ta a, ama rual chuan puithiam lalte leh lehkhaziaktute leh upate hnên ata mipui tam tak, khandaih leh talhtum kengin an lo thleng bawk a. 48Tin, a mantîrtu tûr chuan chhinchhiahna tûr a lo hrilh lâwk diam a, “Ka fawh apiang chu amah a ni ang, man ang che u,” tiin. 49Tichuan, Isua chu a va pan ta nghâl a, “Chibai, Rabbi!” tiin a fâwp ta ngawih ngawih a. 50Tin, Isuan a hnênah, “Ṭhiana, i rawn kal chhan chu ti rawh,” a ti a. Chu veleh Isua chu an chelh a, an man ta a.
51Tin, ngai teh, Isua hote zînga pakhat chuan a kutin a ban a, a khandaih a phawi a, puithiam lalber bawih chu a sât a, a beng a sah thlâksak a. 52Tin, Isuan a hnênah, “I khandaih kha a dahnaah dah leh rawh, khandaih ruaitu zawng zawng chu khandaih vêkah an thi dâwn si a. 53Tûnah pawh vântirhkoh sângruk hmun sâwm leh hmun hnih aia tam zâwk mi rawn tirhsak tûrin ka Pa hnênah ngên thei lovin mi ring em ni le? 54Nimahsela, ngên ang ila, engtin nge Pathian Lehkha Thu - hetianga a lo awm tûr thu hi - a thlen theih ang le?” a ti a.
55Chumi lai tak chuan Isuan mipuite hnênah chuan, “Khandaihte, talhtumte kengin, suam hmang man tûr ang maiin min man tûrin in lo chhuak a ni maw? Pathian biak inah ni tin zirtîrin ka ṭhu ṭhîn a, min man si lo va. 56Nimahsela, zâwlnei lehkha thute chu a lo thlen theihna tûrin hêng zawng zawng hi a lo awm ta a nih hi,” a ti a.
Chumi lai chuan zirtîrte zawng zawng chuan amah chu an thlahthlam a, an tlân bo ta vek a.

Sanhedrin hmaah Isua an hruai

(Mk 14.53-65; Lk 22.54, 63-71; Joh 18.12-14, 19-24)
57Tin, Isua mantute chuan puithiam lalber Kaiapha ina lehkhaziaktute leh upate awm khâwmnaah chuan ani chu an hruai ta a. 58Nimahsela, Peteran hla tak aṭangin amah chu a zui a, Puithiam Lalber in hual chhûng kawtlai thlengin; tin, a va lût a, a tâwpna hmu tûrin chhiahhlawhte zîngah a ṭhu ve a.
59Tin, amah an tihhlum theihna tûrin, puithiam lalte leh rorêltuho zawng zawng chuan Isua hêkna an zawng a; 60hretu der tam tak lo kal mah sela, an hmu si lo. Nakinah erawh chuan mi pahnih an lo kal a, 61“He mi hian, ‘Pathian biak in hi ṭhiata, ni thum chhûnga sa leh thei ka ni,’ a ti e,” an ti a. 62Tichuan, puithiam lalber chu a ding chhuak a, a hnênah, “Eng mahin i chhâng lo maw? Hêng hian an hêkna che hi engtizia nge ni?” a ti a. 63Isua erawh chu a ngawi reng a. Tin, puithiam lalber chuan a hnênah, “Pathian nung chhâlin thu ka pe a che, Krista, Pathian Fapa chu i ni emaw, min hrilh rawh,” a ti a. 64Isuan a hnênah “Ni e. Nimahsela, ka hrilh a che, tûn hnuah Mihring Fapa hi thiltihtheihna ding lama ṭhua, vân chhûm chunga lo kal in la hmu dâwn a ni,” a ti a.
65Tin, puithiam lalber chuan a silhfênte a pawt thlêr a, “Pathian a sawichhe ta: hretu dang engah nge kan ngaih tawh ang? Ngai teh u, Pathian a sawichhiatzia chu tûnah in hre tawh e. 66Engtin nge in ngaih?” a ti a. Anni chuan, “Thi tlâk a ni,” tiin an chhâng a. 67-68Tin, a hmaiah chil an chhâk a, an hnek a; ṭhenkhat chuan, “Nang Krista, tuin nge bêng che? Min hrilh rawh,” tiin an bêng a.

Peteran Isua a phat

(Mk 14.66-72; Lk 22.56-62; Joh 18.15-18, 25-27)
69Tin, Petera chu pâwnah, in hual chhûng kawtlaiah chuan a ṭhu a; tin, nula pakhat a hnênah a lo kal a, “Nang pawh Isua, Galili rama mi hnêna awm kha i nih hi,” a ti a. 70Ani erawh chuan, “I thusawi chu ka hre hauh lo mai,” tiin an zaa hmaah a pha a. 71Tin, sumhmuna a va chhuah veleh nula dangin ani chu a hmu a, chuta awmte hnênah chuan, “He mi pawh hi Isua, Nazareth mi hnêna awm kha a nih hi,” a ti a. 72Tin, “Chu mihring chu ka hre lo,” tiin, chhechhamin a pha leh a. 73Tin, rei lo tê achinah a kianga dingte chuan Petera hnênah, “Nang pawh an zînga mi i ni ngei mai, i ṭawngah a hriat alâwm,” an ti a. 74Tin, ani chuan, “Chu mihring chu ka hre lo,” tiin, ânchhia inlawhin chhia a chham ta a. Tin, âr a khuang ta nghâl a. 75Tin, Petera chuan Isuan, “Âr a khuan hmain nangin vawi thum mi phat ang,” a tih thu kha a lo hre leh ta a. Tin, a chhuak a, a ṭap ta zawih zawih a.