Nawhchizuar chunga rorêlna

1Tin, vântirhkoh pasarih, berhbu pasarih kengte zînga pakhat chuan mi bia a, “Hawh teh, tui tam taka ṭhu nawhchizuar ropui tak hremna chu ka entîr ang che;2leia lalte chuan ani chu an ngai ṭhîn a, leia awmte pawh chu a mi ngaih chînna uain chuan hrai ruihin an awm ṭhîn,” a ti a.
3Chutichuan, ani chuan Thlarauvin thlalêrah mi kalpui a; tin, Pathian sawichhiatna hminga khat, lu sarih leh ki sâwm nei sakawlh sen tak chunga chuang hmeichhia ka hmu a. 4Chu hmeichhia chuan puan senduk leh senlâr a sin a, rangkachak leh lung man tam leh tuikeplungin a inchei a, rangkachak no, thil tenawm, a mi ngaih chînna thil bawlhhlawha khat a keng a, 5a chalah chuan thurûk, “Babulon Khaw Ropui, Leia Nawhchizuarte leh Thil Tenawmte Nu,” tia hming ziak a awm a. 6Tin, chu hmeichhia chu mi thianghlimte thisen leh Isua martarho thisena ruiin ka hmu a. Ka hmuh veleh mak ka ti êm êm mai a.
7Tichuan, vântirhkoh chuan ka hnênah, “Eng vângin nge mak i tih? Kha hmeichhia leh a phurtu sakawlh, lu sarih leh ki sâwm nei thurûk chu ka hrilh ang che. 8Sakawlh i hmuh kha a awm tawh zet a, a awm leh ta lo va; tin, leilâwt aṭangin a lo chhuak chho vang a, boralnaah a kal ang. Tin, leia awmte, leilung pian tirh ata Nunna Bua hming ziak lohte chuan sakawlh chu an hmuh hunah, a awm tawh zet a, a awm leh ta lo va, a lo kal leh dâwn chu mak an la ti ang. 9Hetah hian fin thiam a ṭûlzia a lang. Lu sarihte chu hmeichhe ṭhutna tlâng sarihte chu an ni. 10Lal pasarih pawh an ni a; pangate chu an tlâwm ta a, pakhat chu a la awm a, pakhat chu a lo la awm rih lo va; a lo awm hunah chuan rei lo tê a awm tûr a ni. 11Tin, sakawlh, awm tawh zeta, awm leh ta lova ngei pawh kha a pariatna a ni a, pasarihte zînga mi kha a ni nghe nghe a; boralnaah a la kal ang. 12Tin, ki sâwm i hmuhte kha lal sâwm, ram la nei lote an ni a; dârkâr khat chhûng erawh chu sakawlh nên thuneihna an la chang ang. 13Chûng chuan thu khat vuain an thiltihtheihna leh thuneihna chu sakawlh an pe ang. 14Chûng chuan Berâmno chu an do vang a; tin, Berâmno chu hotute Hotu leh lalte Lal a nih avângin anni chu a hneh ang a; tin, a hnêna awm - koh te, thlan te, rinawm te chuan an hneh bawk ang,” a ti a.
15Tin, amah vêk chuan ka hnênah, “Nawhchizuar ṭhutna tui i hmuhte kha, mi te, mipui te, hnam te, ṭawng te a ni a. 16Ki sâwm i hmuh leh sakawlh ngei chuan nawhchizuar chu an hua ang a, eng mah nei lo leh saruakin an siam ang a, a sa pawh an ei ang a, meiin an hâl ral ang. 17Pathian thute chu a thlen hma loh chuan a duh zâwng an tihna tûr leh, thu khat an lo vuakna tûr leh, an ram chu sakawlh hnêna an pêkna tûrin Pathianin an thinlungah a tîr si a. 18Tin, i hmeichhe hmuh kha khaw ropui, leia lalte chunga rorêltu chu a ni,” a ti a.