Ahaba thlahte an that mang

1Ahaban Samari-ah chuan fapa sawmsarih a nei a. Tin, Jehua chuan Samari-ah, Jezreel khaw hotu, upate hnênah leh Ahaba fate lo enkawl tleitute hnênah chuan, 2“He lehkha hi in hmuh veleh, in pu fate chu in hnênah an awm a ni a; tin, tawlailîrte, sakawrte, kulhpui nei khuate pawh, râlthuamna nên in nei a; 3chutichuan, in pu fate zînga mi a ṭha ber leh a fel ber zawng chhuak ula, a pa lalṭhutthlêngah ṭhuttîr ula, in pu chhûngte do chu dopui rawh u,” tia ziak lehkha a thawn a. 4Nimahsela, anni chuan an hlau ta êm êm mai a, “Ngai teh u, lal pahnih pawh khân an chelh tawh lo a ni a, keinin engtin nge kan chelh tehlul ang?” an ti a. 5Tin, lal in chhûnga hotu ber te, khawpui awptu te, upaho te, naupangho lo enkawl tleitute nên chuan Jehua hnênah, “I chhiahhlawhte kan ni e, ti tûra min hrilh apiang chu kan ti zêl ang; tu mah lalah kan siam lo vang; nangin ṭha i tih ang angin ti ang che,” tiin mi an tîr a.
6Tin, an hnênah, “Ka lama ṭang in niha, ka thu in awih dâwn chuan in pu fapate lu han la ula, naktûk hetih hun hma hian Jezreel khuaah ka hnênah lo kal ang che u,” tiin lehkha a thawn leh a. Lal fapate chu sawmsarih an ni a, khawpui mi lianho, anmahni enkawl tleitute hnênah chuan an awm a. 7Tin, lehkha chu an han hmuh chuan heti hi a ni a, lal fapate chu an man a, a sawmsarih chuan an that a, an lu chu bâwmrângah an dah a, Jezreel khuaah a hnênah an thawn ta a. 8Tin, zualko a lo thleng a, “Lal fapate lu chu an rawn la ta e,” tiin a hrilh a. Tin, ani chuan, “Kulh luhna kawngka bulah hmun hnihah tiang khâwm ula, naktûk thlengin awm rawh se,” a ti a. 9Tin, a tûkah chuan heti hi a ni a, a va chhuak a, a ding a, mi zawng zawng hnênah chuan, “Mi fel in ni e; ngai teh u, ka pu chu ka phiar a, ka lo tihlum ta tak a; a nih leh, hêngho zawng zawng hi tu thah nge ni? 10Lalpan Ahaba chhûngte chungchâng thu a sawi, ‘Lalpa thu chu leilungah hian a luang ral hlek lo vang tih hre rawh u,’ tia Lalpan a chhiahhlawh Elija hmanga a sawi kha a rawn hlen ta a nih hi,” a ti a. 11Chutichuan, Jehua chuan Jezreel khuaa Ahaba chhûngte la awm zawng zawng leh, a mi lian zawng zawng leh a ṭhian zawng zawng leh, a puithiamte chu pakhat mah zuahsak hlek lovin a that fai vek a. 12Tin, a tho va, a chhuak a, Samari-ah a kal ta a.

Lal Ahazia chhûngte an that

13Jehua chuan Juda lal Ahazia unauteho a hmu a, “Tute nge in nih?” a ti a. Tin anni chuan, “Ahazia unaute kan ni a, lal fateho leh lalnu fateho chibai kan zuk bûk dâwn a ni,” tiin an chhâng a. 14Tin, ani chuan, “A nungin man rawh u,” a ti a. Tichuan, a nungin an man a, berâm hmul mehna in khur bulah chuan an that a, mi sawmli leh pahnih zet an ni a; pakhat mah a zuah lo.

Ahaba chhûngte zawng zawng an that

15Tin, chuta ta a chhuah hnu chuan Rekaba fapa Jehonadaba, amah hmuak tûra lo kal a va hmu a; tichuan, chibai a bûk a, a hnênah, “I chunga rilru dik ka pu ang hian, rilru dik i pu ve emaw chu?” a ti a. Jehonadaba chuan, “Pu e,” tiin a chhâng a. “A nih leh i kut mi han pe teh,” a ti a. Tichuan, a kut chu a han pe a; tin, ani chuan a hnênah a tawlailîr chhûngah a kai lût a. 16Tin, ani chuan, “Ka hnênah lo kal ve la, Lalpa tâna ṭhahnem ka ngaihzia hi han hmu ve teh rêng khai,” a ti a. Chutichuan, a tawlailîrah a chuantîr ve ta a. 17Tin, Samari a va thlen chuan, Ahaba chhûngte Samari-a la awm chhunate chu a tihboral zawh vek hma loh chuan a that zêl a, Elija hnêna a sawi Lalpa thu ang ngei khân.

Baala betute an that

18Tin, Jehua chuan mipuiho zawng zawng chu a ko khâwm a, an hnênah chuan, “Ahaba khân Baala rawng hi a bâwl hlek chauh a ni a, Jehua erawh hi chuan nasa takin a nia a bâwl dâwn ni. 19Chutichuan, Baala zâwlneiho zawng zawngte, a betu zawng zawngte leh a puithiam zawng zawngte ka hnênah hian han ko khâwm teh u. Tu mah kim lo suh se; Baala hnênah hian inthawina ropui tak hlan tûr ka nei a; tu pawh a kim lo apiang chu a nung hlek lo vang,” a ti a. Nimahsela, Jehua chuan Baala betute chu tihhlum tumin, fin vervêkin a ti a ni. 20Tin, Jehua chuan, “Baala hmingin kûtpui siam rawh u,” a ti a. Tichuan, chu chu an than vêl ta a. 21Tin, Jehua chuan Israel ram zawng zawngah a thawn vêl a; tichuan, Baala betute zawng zawng chu an lo kal a, tel lo rêng rêng an awm lo. Tin, Baala inah chuan an lût a; tin, Baala in chu kawngka aṭanga kawmchâr thlengin an khat hmur mai a. 22Tin, inthuamna puan enkawltu hnênah, “Baala betu zawng zawngte hi inthuamna puan han lâksak rawh,” a ti a. Tichuan, inthuamna puante chu a rawn lâksak a. 23Tin, Jehua chu, Rekaba fapa Jehonadaba nên Baala inah chuan an lût a; tin, Baala betute hnênah chuan, “Hetah hian Baala betute chauh lo, Lalpa mite hi an lo awm ve dah ang e, zawng ula, en vêl teh u,” a ti a. 24Tin, inthawinate leh hâlral thilhlan hlân tûrin an lût ta a. Jehua chuan pâwnah mi sawmriat a lo dintîr tawh rêng a, “Hêng in kuta ka pêk che u hi tu pawh an chhuah vaih chuan, a chhuahtu chuan a nun aiah ama nunna chu a chân ang,” a ti a.
25Tin, hâlral thilhlan a hlan zawh veleh heti hi a ni a, Jehua chuan vêngtu sipai leh an hotute hnênah, “Va lût ula, va that rawh u; tu mah chhuahtîr suh u,” a ti a. Tin, khandaihin an sât chiam a; tin, vêngtu sipai leh an hotute chuan an paih chhuak a; tin, Baala in chhûngrilah chuan an lût zêl a. 26Tin, Baala ina milemte chu an la chhuak a, an hâl a. 27Tin, Baala lungphun chu an tichim a, Baala in chu an tichhia a, dailênna inah an hmang ta a, tûn thleng hian an la hmang a ni. 28Chutiang chuan Jehua chuan Israel ram ata Baala chu a tiboral a ni. 29Nimahsela, Nebata fapa Jeroboama sualna - Israel-hote thil tihsualtîra a tihte chu Jehua chuan a bân chuang lo, chu chu Bethel khua leh Dan khuaa rangkachak bâwngno lemte biak a ni. 30Tin, Lalpan Jehua hnênah, “Ka mittlung taka thil i tih avâng leh ka rilru duhthusâm ang taka Ahaba chhûngte chunga i tih avângin, i fapate chu chhuan lina thlengin Israel-te lalṭhutthlêngah an ṭhu ang,” a ti a. 31Nimahsela, Jehua chuan Lalpa, Israel-te Pathian dân chu a thinlung zawng zawngin a pawm lo va; Jeroboaman Israel-hote thil tihsualtîra a tih sual kha a bân chuang lo va.

Jehua a thi

32Chûng lai chuan Lalpan Israel-te ram chu a tihzîmsak ṭan ta a; tichuan, Hazaelan Israel ram zawng zawngah chuan a hneh zêl a; 33Jordan aṭanga khawchhak lam Gilead ram zawng zawng - Gad-hote, Reuben-hote, Manase-hote - Arnon ruama Aroer aṭanga Gilead leh Basan ram thleng rakin. 34Jehua chanchin dangte, a thiltih zawng zawngte, a thiltihtheihzia zawng zawngte chu Israel lalte lal lai thu ziakna buah chuan a chuang a ni lâwm ni? 35Tichuan, Jehua chu a pi leh pute hnênah chuan a muhîl a, Samaria khuaah an phûm ta a. Tin, a fapa Jehoahaza chu a aiawhin a lal ta a. 36Tin, Samari rama Israel-te chunga Jehua rorêl chhûng chu kum sawmhnih leh kum riat a ni.