1Tin, Elisan, “Lalpa thu hi lo hre rawh u. Lalpan heti hian a ti: ‘Naktûk hetih hun vêlah hian Samari kulh kawngka bulah chuan chhangphut dip mi tehkhâwng khat chu sekel khatah an hralh ang a, barli tehkhâwng hnih chu sekel khatah,’ tiin,” a ti a. 2Tin, sipai hotu, lalin a kut a rawn rinchhana chuan Pathian mi chu a chhâng a, “Ngai teh, Lalpan vânah tukverh a hawn chu le! Chutiang chu a ni thei tehlul ang maw?” a ti a. Tin, ani chuan, “Ngai rawh, i mit zawngin i hmu ngei ang a, a ei erawh chu i ei dâwn lo a ni,” a ti a.

Suria sipai rual an tlânchhia

3Tin, kulh luhna kawngka bulah chuan phâr pali an awm a; anni chuan, “Eng atân nge maw thih nghâk maia kan ṭhut reng le? 4‘Khaw chhûngah i lût teh mai ang u,’ han ti dâwn ila, khaw chhûng an ṭâm a, kan va thi mai âwm si a; tin, hetah hian ṭhu reng dâwn ila, kan thi tho tho âwm bawk si a. Chutichuan, hawh teh u, Suria sipaihote hnên lamah i tlu lût rawk mai teh ang u. Min zuah leh kan nung ang a; min thah leh kan thi a ni mai ang chu,” tiin an inbia a. 5Tichuan, Suria-hote riahhmuna kal tûr chuan thimhmulah an thawk chhuak ta a; tin, Suria-ho riahhmun tawntirh an va thlen chuan, ngai teh, tu mah an lo awm lo va. 6Lalpan Suria sipaihote chu tawlailîr thâwm te, sakawr thâwm te, sipai tam tak thâwm te a hriattîr a ni a; tichuan, “Ngai teh u, Israel lal hian Hit lalhote, Aigupta lalhote hi min rawn bei tûrin a ruai a nih hi,” tiin an inbia a. 7Chutichuan, an tho va, thimhmulah chuan an tlânchhe ta a, an puan inte, an sakawrte, an sabengtungte leh an riahhmun chu a awm ngai ngaiin an tlânsan a, an tlânchhe ta chiam a.
8Tin, chûng phârho chuan riahhmun tawntirh an va thlen chuan puan in pakhatah hian an va lût a, an eiin an in a, chuta tangkarua leh rangkachak te, silhfên te chu an la a, an va thukru a; tin, an va lêt leh a, puan in dangah an lût leh a, chuta mi pawh chu an la a, an va thukru leh a. 9Nakinah chuan, “Kan tidik hauh lo mai a! Vawiin hi chanchin lâwmawm thlen nî a ni a, keini hi kan ngawi reng mai a; khawvâr kan nghah chuan hrem kan tâwk mai ang; chutichuan, hawh u, lal chhûngte i va hrilh ang u,” tiin an inbia a. 10Chutichuan, khaw kawngkhâr vêngtu chu an va au va, “Suria-ho riahhmunah kan va kal a; tin, ngai teh, tu mah an lo awm lo va, mihring thâwm rêng rêng pawh a awm lo va, sakawrte leh sabengtungte chauh a lo inthlung a, puan inte pawh chu a awm ngai ngaiin a awm reng mai,” tiin an hrilh a. 11Tin, kawngkhâr vêngtute chu a ko va; tin, anni chuan lal in chhûnga mite chu an va hrilh a.
12Tin, lal chu zânah chuan a tho va, a puipate hnênah chuan, “Suria-hote min tih dân hi ka hrilh teh ang che u. Kan rilṭâmzia hi an hria a; chuvângin, ‘Khawpui ata an lo chhuah chuan a nungin kan lo man ang a, khaw chhûngah kan lût dâwn zuk nia,’ tiin ramah biru tûrin an riahhmun an chhuahsan a nih hi,” a ti a. 13Tin, a puipa pakhat chuan a chhâng a, “Khawpuia sakawr awm chhunte zînga panga hi tute emaw hruaitîr rawh khai (ngai teh, Israel mipuiho, a la dam zawng zawngte ang bawk an ni tho tho va; ngai teh, Israel mipuiho thia ngaihte ang bawk an ni tho tho alâwm); tichuan, i va tîr teh rêng ang u,” a ti a. 14Chutichuan, tawlailîr hnûktu sakawr pahnih an hruai a; tin, lal chuan, “Va en teh ta u,” tiin, Suria sipaihote ûm tûrin a tîr a. 15Tin, Jordan lui thlengin an va ûm a; tin, ngai teh, Suria-hoten an hmanhmawh avânga an paih silhfênte leh bungruate chu kawng tluanin a awm zel zul mai a. Tin, a mi tirhte chu an lo kir leh a, lal chu an rawn hrilh a. 16Tin, mipui chu an va chhuak a, Suria-ho riahhmun chu an va suam ta chiam a. Chutichuan, Lalpa thu ang ngeiin chhangphut dip mi tehkhâwng khat chu sekel khatah an hralh a, buhsanghar tehkhâwng hnih chu sekel khatah.
17Tin, lal chuan sipai hotu, a kut a rawn rinchhana kha kulh kawngka vêngtuah a ruat a; tin, mipuite chuan kulh kawngka bulah chuan an chîl ta nuaih nuaih a, Pathian miin a hnêna lal a lo chhuk laia a lo sawi ang khân a thi ta a. 18Heti hi a ni a, Pathian miin lal hnêna, “Naktûk hetih hun vêlah hian Samari kulh kawngka bulah buhsanghar tehkhâwng hnih chu sekel khatah an hralh ang a, chhangphut dip mi tehkhâwng khat chu sekel khatah,” a tiha, 19sipai hotuin Pathian mi chu a chhâna, “Ngai teh, Lalpan vânah tukverh a hawn dâwn chu le! Chutiang chu a ni thei tehlul ang maw?” a tiha, anin, “Ngai rawh, i mit zawngin i hmu ngei ang a, a ei erawh chu i ei dâwn lo a ni,” tia a sawi kha. 20Chutiang ngei chuan a chungah a lo thleng ta a ni; mipuiin kulh kawngka bulah chuan an chîl nuaih nuaih a, a thi ta a ni.