Kanaan ram la tûrin Pathianin Josua thu a pe

1Tin, heti hi a ni a, Lalpa chhiahhlawh Mosia thih hnu chuan Mosia rawngbâwltu Nuna fapa Josua hnênah Lalpan, 2“Ka chhiahhlawh Mosia chu a thi ta a; chutichuan, tho la, nang leh hêng mipuiho zawng zawng nên hian Jordan lui hi kân ula, anmahni, Israela thlahte ka pêk ramah chuan kal rawh u. 3Mosia hnêna ka sawi tawh ang khân in kephaha in rah apiang chu ka pe vek a che u. 4Thlalêr aṭang leh he Lebanon tlâng aṭanga lui lian pui Euphrates lui thlenga Hit-ho ram zawng zawng, ni tlâkna lam tuifinriat zau tak thlengin in ramri a ni ang. 5I dam chhûng zawng tu mah rêng rêngin an chelh lo vang che; Mosia hnêna ka awm ang khân i hnênah pawh ka awm ve dâwn e. Ka tithlâwn lo vang chia, kal pawh ka kalsan tawp lo vang che. 6Chak tak leh huai takin awm rawh; an thlahtute chhechhama pêk ka lo tiam tâk ram kha hêngho hi i luahtîr dâwn si a. 7Ka chhiahhlawh Mosian dân zawng zawng zawm tûra thu a pêk che kha zâwm tlat tûrin chak tak leh huai takin awm phawt mai rawh; i kalna apianga i lo hmuingîl zêl theihna tûrin i ding lamah emaw, i vei lamah emaw pênsan hauh suh ang che. 8He dân bu hian i kâ chu chhuahsan hlek suh se; chumi thuziak zawng zawng chu i zawm tlat theih nân chhûn leh zân i ngaihtuah zâwk tûr a ni; tichuan, i kawngte chu i lo titluang zel ang a, i lo hmuingîl zêl dâwn nia. 9Thu ka pe che a ni lâwm ni? Chak tak leh huai takin awm rawh; hlau suh la, zâm hek suh; Lalpai Pathian chu i kalna apiangan i hnênah a awm zêl dâwn alâwm,” tiin a sawi a.

Josuan mi dangte thu a pe

10-11Chutichuan, Josuan mipui hotute hnênah chuan, “Riahhmun va fang ulangin, mipuite hnênah, ‘Ei tûrte buatsaih rawh u khai, ni thum chhûngin Lalpa in Pathianin ram luah tûr a pêk che u hi luah tûrin Jordan lui hi in kân dâwn a ni e,’ tiin thu pe ang che u,” tiin thu a pe a.
12Tin, Reuben-hote, Gad-hote leh Manase hnam zâtvete hnênah chuan Josuan, 13“Lalpa in Pathianin chawlhna a pe che u a, he ram hi a la pe dâwn che u tia Lalpa chhiahhlawh Mosian thu a pêk che u hi hre reng ang che u. 14In nupuite, in fanau tê tête leh in ran rualte hi chu Jordan lui râla Mosian ram a lo pêkah che u chuan an awm ang a; nangni mi chak huaisenho zawng erawh chu inrâlthuamin in lo kai hmasa ang a, in unaute in lo ṭanpui ang a, 15Lalpan in unaute chu nangmahni ang bawka chawlhna a pêka, Lalpa in Pathianin ram a pêk chu anni pawhin an luah ve hma loh chuan. Tichuan, Lalpa chhiahhlawh Mosian Jordan lui râl, ni chhuahna lam ram in puala a lo pêk che u lamah chuan in lêt leh ang a, in la luah dâwn nia,” tiin a sawi a.
16Tin, anni chuan, “Tih tûra i thu min pêk zawng zawng chu kan ti zêl ang e; tin, i mi tirhna apiangah pawh kan kal zêl ang. 17Kawng engkima Mosia thu kan zâwm zêl ṭhîn ang khân, i thu pawh kan zâwm zêl ang e; Lalpa i Pathian chu Mosia hnêna a awm ṭhîn ang khân i hnênah hian awm ve phawt mai rawh se. 18Tu pawh i thupêk chunga hela, thu i pêk apiang zâwm duh lo chu tihhlum tûr an ni ang. Chak tak leh huai takin awm phawt mai rawh,” tiin Josua chu an chhâng a.