Ai khua tihchhiat thu

1Tin, Lalpan Josua hnênah, “Hlau suh la, zâm hek suh; râl kâp mi zawng zawng i hnênah hruai langin, tho la, Ai khuaah han kal rawh. Ngai teh, Ai khaw lal leh, a mite leh a khua leh a ram chu i kutah ka pe tawh e. 2Jeriko leh an lal chunga i tih ang khân Ai khua leh an lal chungah pawh i ti dâwn nia. Râllâk leh rante chauh chu nangmahni pualah nei ang che u. Khawpui châng ru tûr a hnung lamah dah ang che,” a ti a.
3Chutichuan, Josua leh râl kâp mi zawng zawng chu Ai khaw lama han kal tûr chuan an thawk ta a; tin, Josuan mi chak huaisen sîngthum a thlang chhuak a, zânah a kaltîr a. 4An hnênah, “Ngai teh u, khawpui hnung lamah khawpui bei tûrin châng ru ang che u. Khawpui aṭanga hla takah chuan kal suh ula, inpeih rengin awm ngawt mai rawh u. 5Tin, kei leh ka hnêna awmho zawng zawng chuan khawpui chu kan rawn hnaih ang a; tin, heti hi a ni ang a, a hma ang bawka min rawn bei tûra an lo chhuah veleh, an hmaah kan tlânchhia ang a. 6Tichuan, min ûm tûrin an lo chhuak ang a, khua ata thui fe kan thlêm chhuah thlengin; anni chuan, ‘A hma ang bawk khân kan hmaah an tlânchhe leh ta le,’ an ti dâwn nia; tichuan, an hmaah kan tlânchhia ang. 7Tichuan, chân rûkna ata in lo chhuak ang a, khawpui chu in la dâwn nia, Lalpa in Pathianin in kutah a pe dâwn e. 8Tin, heti hi a ni ang a, khawpui chu in lâk veleh khawpui chu hâl ang che u. Lalpa thu ang zêlin in ti tûr a ni. Ngai teh u, thu ka pêk tawh che u hi,” tiin thu a pe a. 9Tin, Josua chuan a kaltîr ta a; tichuan, chân rûkna hmunah chuan an kal a, Ai khaw thlang lamah, Bethel leh Ai khaw inkârah chuan an awm a; Josua erawh chu chumi zân chuan mipuite zîngah a riak a.
10Tin, Josua chu zîng takah a tho va, mipuite chu a kai khâwm a; tin, amah leh Israel-ho upate chu mipuiho hmaah chuan Ai khaw lamah an han kal ta a. 11Tin, mipuiho zawng zawng, a hnêna râl kâp mi awmte chu an han kal a, an han hnaih a, khawpui bulah chuan an han kal a, Ai khaw hmâr lampangah an han riak a. Ai khua nêna an inkârah chuan ruam a awm. 12Tin, mi sângnga lai a hruai a, khawpui thlang lampang, Bethel leh Ai khaw inkârah chuan a chân rûktîr a. 13Chutichuan, mipui, khawpui hmâr lampanga sipaihote ṭanhmun leh khawpui thlang lampanga a chângrutute ṭanhmun chu an han ruat fel a; tin, Josua chu chumi zân chuan ruam lai takah a kal a. 14Tin, heti hi a ni a, Ai khaw lalin chu chu a lo hmuh veleh hmanhmawh takin zîng takah a tho va, chumi khuaa mite chu amah leh a hote zawng zawng nên, a hmun ruat Araba zâwnah chuan Israel-hote chu bei tûrin an chhuak ta a; nimahsela, khaw hnung lamah chuan amah bei tûrin an châng ru tih a hre lo va. 15Tin, Josua leh Israel-ho zawng zawng chu dawl ta ni âwm takin an awm a, thlalêr lam kawngah an tlân chiam a. 16Tin, khawpuia awm zawng zawng chu anmahni ûm tûrin an inko khâwm a. Tichuan, Josua chu an ûm a, khawpui ata chu thui fe thlêm chhuahin an awm ta a. 17Tin, Ai khuaah leh Bethel khuaah chuan Israel-hote ûm lo chu pakhat mah an awm ta lo va. Khawpui chu khâr lohvin an chhuahsan ta mai a, Israel-hote chu an ûm ta a.
18Tin, Lalpan Josua hnênah, “I fei ken kha Ai khaw lam hawiin lek rawh; i kutah ka pe dâwn a nia,” a ti a. Tichuan, Josua chuan a fei ken chu khawpui lam hawiin a han lek ta a. 19Tin, châng rutute kha an awmna ata chu an lo chhuak thuai a; a kut a han phar veleh an tlân a, khawpuiah chuan an lût a, an la ta a; tin, khua chu an hâl ta thuai a. 20Tin, Ai-hote chuan an hnung lam chu an han thlîr chuan, ngai teh, khawpui chu vân lama khu chho ngut ngutin an hmu ta a, khawii lam mah maha tlân theihna rêng rêng an nei ta lo mai a; tichuan, thlalêra tlânte khân a ûmtute chu an rawn do lêt ta thung a. 21Tin, Josua leh Israel-ho zawng zawng chu, châng rututen khawpui an lâka, khawpui khu chu a chho ngut ngut an han hmuh chuan an lêt leh a, Ai-hote chu an that ta a. 22Tin, mi dangte chu a bei tûrin khaw chhûng ata an lo chhuak a; chutichuan, Israel-hote chuan an kârcheh ta a, a ṭhen a lehlamah an awm a, a ṭhen a lehlamah. Tichuan, an that a, pakhat mah zuah leh chhuah rêng rêng an nei lo va. 23Tin, Ai khaw lal chu a nungin an man a, Josua hnênah an hruai a.
24Tin, heti hi a ni a, Israel-hote chuan Ai khuaa mi, phûla awm zawng zawng chu thlalêr rama an va ûmna hmuna an thah zawha, an zaa khandaiha an thah chimih vek hnu chuan, Israel-ho zawng zawng chu Ai khaw lamah an kîr leh a, khandaihin an han bei a. 25Tin, chumi nia thi zawng zawng chu a hmei a pain sîngkhat leh sânghnih an ni, Ai khuaa mi zawng zawng chu. 26Josuan a fei lekna kut chu Ai-ho zawng zawng a tihboral dêr hma loh chuan a la thla si lo va. 27Lalpan Josua thu a pêka, tih tûr a tih ang ngei khân chu khawpuia rante leh râllâkte chauh chu Israel-hote chuan anmahni pualah an nei a. 28Chutichuan, Josuan Ai khua chu a hâl a, kumkhua atân leipâwngah a siam a, tûn thleng hian tihṭiau a lo ni ta. 29Tin, Ai khaw lal chu tlai thlengin thinglêrah a khai a. Tin, ni tlâk dâwnin Josuan thu a pe a; tichuan, a ruang chu thinglêr ata an la thla a, khawpui kulh kawngka luhnaah an paih a, a chungah lung an tiang vûm thûr a, tûn thlengin a la awm.

Ebal tlângah dân an chhiar chhuak

30-31Tin, Mosia dân lehkhabua ziak tawh angin, Lalpa chhiahhlawh Mosian Israela thlahte thu a lo pêk tawh ang khân, Josuan Ebal tlângah Lalpa, Israel-te Pathian tân maichâm, lung chher loh, tu mahin thîra an la chher ngai hek loh maichâm a siam a. Chutah chuan Lalpatân hâlral thilhlante an hlân a, remna inthawiin an inthawi a. 32Tin, chutah chuan Israela thlahte hma ngeiah Mosian dân a ziak kha lungahte chuan a ziak chhâwng a. 33Tin, Israel-ho zawng zawng, an upate leh hotute, an rorêltute nên, Levi chi puithiamho, Lalpa thuthlung bâwm zâwntute hmaah, bâwm lehlampangah chuan hnam dang pawh, chumi rama piang pawh an ding za vek a; a zâtve chu Gerizim tlâng pangah an awm a, a zâtve chu Ebal tlâng pangah an awm a; Lalpa chhiahhlawh Mosian Israel-hote chu mal an sâwmsak phawt tûr a ni tih thu a pêk tawh ang khân. 34Tin, chumi zawhah chuan dân thu zawng zawng, malsâwmna thu leh ânchhe dawn thu chu a chhiar a, dân lehkhabua chuang zawng zawng ang kha. 35Mosia thupêk zawng zawng chu Israel-ho pung khâwm zawng zawng leh, hmeichhiate leh naupang tê tête leh, an zînga hnam dang chêng vete hriatah chuan Josuan chhiar loh rêng rêng a nei lo.