Solomonan tempul a puah

(2 Chro 2.1-18)
1Tin, Tura lal Hiraman Solomona hnênah a mite a tîr a, a pa aiah lal atân hriak an thih tih a lo hre ta si a; Hirama chu Davida ngaina ṭhîntu a ni fo rêng a. 2Tin, Solomona chuan Hirama hnênah, 3“Ka pa Davida khân Lalpan a kephah hnuaia a dah hma loh kha chuan a vêl kil tin kil tanga indonate avâng khân, Lalpa a Pathian hming atân in a sa thei lo tih i hria a. 4Tûnah erawh chuan Lalpa ka Pathianin kil tin kil tangah muanna min lo neihtîr ta a; hmêlmate an awm ta lo va, vânduaina pawh a awm ta hek lo. 5Tin, ngai teh, Lalpan ka pa Davida hnêna, ‘I fapa, i aia i lalṭhutthlêng ka la luahtîr tûra chuan ka hming atân in chu a la sa ang,’ tia a lo sawi tawh ang khân, Lalpa ka Pathian hming atân in sak ka tum a. 6Chutichuan, Lebanon tlânga mi sidar thingte mi kihsak tûrin thu pe langin, ka chhiahhlawhte pawh i chhiahhlawhte zîngah an tel ve ang a; tin, i chhiahhlawhte hlawh chu i sawi ang apiang ka pe zêl ang che; Zidon mite anga thing kih thiam kan zîngah tu mah an awm lo tih i hre si,” tiin mi a tîr a.
7Tin, heti hi a ni a, Hiraman Solomona thu a lo hriat chuan a lâwm ta êm êm mai a, “Hêng mi tam tak chunga rorêl tûra fapa fing tak Davida petu Lalpa chu vawiinah hian fakin awm rawh se,” a ti a. 8Tin, Hiraman Solomona hnênah, “I thu mi han chah chu ka lo hria a; sidar thing thu leh fâr thing thu chu i mamawh apiang ka lo ti ang e. 9Ka chhiahhlawhten Lebanon tlâng aṭangin tuifinriat thlengin an rawn la thla ang a; i hmun mi ruatsak tûra tuifinriata tawlh tûrin ka têltîr ang a, chumi hmunah chuan ka phelhtîr ang a, nangin i lo la dâwn nia; tin, nang pawhin ka chhûngkuate ei tûr tumin ka mamawh i lo phuhru ve thung a ni ang chu,” tiin mi a tîr a. 10Chutichuan, Hirama chuan sidar thing leh fâr thing chu Solomona hnênah a mamawh apiang a pe a. 11Tin, Solomonan Hirama chu a chhûngkuate ei atân buh tehkhâwng sînghnih leh hriak sâwr tehkhâwng sawmhnih a pe a. Chu chu Solomonan kum tina Hirama a pêk ṭhin dân chu a ni. 12Tin, Lalpan a tiam ang ngeiin Solomona chu finna a pe a; tin, Hirama leh Solomona kârah chuan inremna a awm a, an pahnih chuan thu an thlung dûn ta a.
13Tin, Lal Solomona chuan Israel-ho zawng zawng zînga mi hnathawka rawih luih pâwl a siam a; rawih luih pâwl chu mi sîngthum an ni. 14Lebanon-ah chuan thla khata inthlâk zêlin sîngkhat a tîr ṭhîn a: thla khat Lebanon-ah an han awm a, thla hnih anmahni in lamah; Adonirama chu hnathawka rawih luihte hotu a ni. 15Tin, Solomona chuan thil phur mi sîngsarih leh, lung chhêr mi sîngriat tlângahte a nei a; 16chûngte chu tiam lovin Solomona chuan a hna chunga hotu bîk, hnathawk vêngtu sângthum leh zathum a nei bawk a. 17Tin, lal thupêkin in lungphûm chu lung chher saa rem tûrin lung lian pui pui, lung man tam tak takte an rawn la a. 18Tin, in satuho, Solomona mite leh Hirama mite leh Gebal mite chuan lungte chu an chher a, in sakna tûr chuan thing leh lungte chu an buatsaih a.