Amnona leh Tamari

1Tin, chumi hnuah chuan heti hi a ni a, Davida fapa Absaloma chuan farnu hmêlṭha tak a nei a, a hming chu Tamari a ni a. Tin, Davida fapa Amnona chuan ani chu a hmangaih a. 2Tichuan, Amnona chu a farnu Tamari avâng chuan a buai ta hle a, a damlo ta a; ani lah chu nula thianghlim a ni si a. A chunga thil eng emaw han tih chu Amnona tân chuan khirh tak a ni. 3Amaherawhchu, Amnona chuan ṭhian a nei a, a hming chu Jonadaba a ni a, Davida unaupa Simea fapa a ni. Jonadaba chu mi fing vervêk tak a ni. 4Tin, a hnênah, “Aw, nang lal fapa hi engtizia nge a ni têla i chêr telh telh chu le? Mi hrilh duh dâwn lâwm ni?” a ti a. Tin, Amnona chuan a hnênah, “Ka unaupa Absaloma farnu Tamari hi ka hmangaih miau mai a ni,” a ti a. 5Tin, Jonadaba chuan a hnênah, “I khumah mu reng la, damlo der la; tin, i pain a rawn en hunah che a hnênah, ‘Khawngaih takin ka farnu Tamari chu ka hnênah lo kal sela, chhang ei tûr mi rawn pe sela; tin, ka hmuh theihah, ka mit hmuh ngeiah ei tûr mi siamsak teh se, a kuta mi ngei ka lo ei ang e,’ lo ti ang che,” a ti a. 6Chutichuan, Amnona chu a mu a, a damlo der ta a; tin, lalin a va en chuan Amnona chuan lal hnênah, “Khawngaih takin ka farnu Tamari lo kal sela, ka mit hmuh ngeiah hian chhangpêr pahnih emaw mi siam sela, ama kuta mi ngei ka lo ei ang e,” a ti a.
7Chutichuan, Davida chuan Tamari hnênah, “I nuṭa Amnona in lamah kal la, ei tûr va siamsak rawh khai,” tiin mi a tîr a. 8Chutichuan, Tamari chu a nuṭa Amnona in lamah chuan a kal a; tin, ani chu a lo mu reng a. Tin, chhang diak a la a, a hmet a, a mit hmuhah chhangpêr chu a siam a, a ur a. 9Tin, a urna chu a la a, a hmaah chuan a bun a; nimahsela, a ei duh lo va. Tin, Amnona chuan, “Mi zawng zawng hian mi chhuahsan vek rawh se,” a ti a. Tichuan, an chhuahsan ta vek a. 10Tin, Amnona chuan Tamari hnênah, “I kuta mi ngei ka ei theih nân ei tûr chu pindanah hian han la tawh rawh le,” a ti a. Tin, Tamari chuan a chhangpêr siamte chu a la a, a nuṭa Amnona hnênah pindanah chuan a la lût a. 11Eitîr tûra a kiang hnaia a va kalpui chu a lo man a, a hnênah, “Ka farnu, lo mu ve teh,” a ti a. 12Tin, ani chuan a chhâng a. “Ni lo ve a, ka nuṭapa, mi tilui suh, Israel-te zîngah hetiang thil hi tih tûr a ni lo ve. He thil sual âtthlâk tak hi ti suh khai. 13Tin, kei hian ka mualphona chu khawiah nge ka thangpui ang? Tin, nang pawh Israel-te zînga mi âa ngaih i lo ni mai ang asin. Chuvângin, lal be zâwk rawh khai, i mi neih chu a hnial lo vang e,” a ti a. 14Nimahsela, a thu chu a pawm lo va, amah aiin a chak zâwk si a, a tilui a, a mutpui ta a.
15Chutichuan, Amnona chuan huat namênlohvin a haw leh ta si a; a huatna chu amah a hmangaih laia a hmangaihna ai maha nasain a ni a huat ni. Tichuan, Amnona chuan a hnênah, “Tho la, kal daih mai rawh,” a ti a. 16Tin, ani chuan a hnênah, “Chuti tûr chu ni lo ve! Hetianga dik lo taka mi tihchhuah hi ka chunga i tih tâk ai mah khân a ṭha lo zâwk a ni,” a ti a. Nimahsela, a pawm duh chuang lo va. 17Chutichuan, a rawngbâwltu a chhiahhlawh chu a ko va, “He hmeichhia hi ka hnên ata chhuahtîr la, kawng kalh hnan tlat rawh,” a ti a. 18Tamari chuan kawrfual ze hrang hranga zia a ha a; chutiang kawrfual chu lal nula thianghlimten an ha ṭhîn a. Chutichuan, a chhiahhlawh chuan a hruai chhuak a, kawng a kalh hnan ta tlat a. 19Tin, Tamari chuan a luah vut a phul a, a kawrfual, ze hrang hranga zia a hâk chu a pawt thlêr a, a chhîpah a kut a dah a, ring taka ṭap chung zêlin a kal ta a.
20Tin, a nuṭa Absaloma chuan a hnênah, “I nuṭa Amnona chu i hnênah a lo lût a ni maw? Nimahsela, ngawi mai rawh, ka farnu. I nuṭa a ni alâwm, engto duh suh,” a ti a. Chutichuan, Tamari chu a nuṭa Absaloma inah ngui takin a inkhung ta tlat mai a. 21Nimahsela, Lal Davidan chûng thil zawng zawng chu a han hriat chuan a thinrim ta hle mai a. 22Tin, Absaloma chuan Amnona hnênah a chhia a ṭha, a enga mah a sawi duh lo va; Absaloma chuan a farnu Tamari a tihluih avângin Amnona chu a haw hle a ni.

Absaloman phuba a la

23Tin, heti hi a ni a, kum hnih pumhlûm a ral hnu chuan Ephraim kianga Baal-hazor-ah Absaloman berâm hmul a mehtîr a; tin, Absaloma chuan lal fapate zawng zawng chu a sâwm a. 24Tin, Absaloma chu lal hnênah a kal a. “Ngai teh, i chhiahhlawhin berâm hmul a mehtîr a, lal leh a chhiahhlawhte chu i chhiahhlawh hnênah hian kal ve ang hmiang,” a ti a. 25Tin, lal chuan Absaloma hnênah, “Ni lo ve, kan tihautak lutuk dah ang che,” a ti a. Tin, ani chuan a sâwm lui chiam a; nimahsela, a kal duh chuang lo va, mal erawh chu a sâwm a. 26Chutichuan, Absaloman, “A nih loh leh ka unaupa Amnona tal kan hnênah kal ang hmiang,” a ti a. Tin, lal chuan a hnênah, “Engah nge a kal bîk ang?” a ti a. 27Nimahsela, Absaloma chuan Amnona leh lal fapate zawng zawng tal chu a hnêna kal ve tûrin a ngen ṭâlh a. 28Tin, Absaloma chuan a chhiahhlawhte chu, “Ngai teh u, Amnona uain ina a hlim laiin in hnênah, ‘Amnona chu that rawh u,’ ka tih che u chuan, that ula, hlau suh u, thu ka pe tawh che u a ni lâwm ni? Intihuai ula, intipasalṭha ang che u,” tiin thu a pe a. 29Chutichuan, Absaloma chhiahhlawhte chuan Amnona chungah Absaloma thupêk ang chuan an ti a. Chutichuan, lal fapate zawng zawng chu an tho va, an sabengtung chungah an chuang ṭheuh va, an tlân bo ta a.
30Tin, heti hi a ni a, kawnglaka an la awm laiin, “Absaloman lal fapate zawng zawng chu a that ta vek mai a, pakhat mah a zuah lo,” tiin Davida hnênah chanchin a lo thleng a. 31Chutichuan, lal chu a tho va, a silhfênte a pawt thlêr a, leiah a mu ta a; tin, a chhiahhlawh zawng zawngte chu an silhfênte pawt thlêrin a kiangah an ding a.
32Tin, Davida unau Simea fapa Jonadaba chuan a chhâng a, “Ka pu chuan lal fapa tlangvâl zawng zawngte chu an that vek a ni tih ring suh se, Amnona chauh a ni thi ni; a farnu Tamari a tihluih achin kha Absaloma chuan hetianga tih hi a tum rêng a ni. 33Chuvângin, ka pu lalpa chuan lal fapate zawng zawng chu an thi emaw tih ringin engto suh se, Amnona chauh a ni thi ni,” a ti a. 34Absaloma erawh chu a tlân bo ta a. Tin, a râl vêngtu tlangvâl chuan a mit a lên a, a han en a; tin, ngai teh, a hnung lama tlâng panga kawngah chuan mi tam tak an lo kal a. 35Tin, Jonadaba chuan lal hnênah, “Ngai teh, lal fapate chu an lo kal e; i chhiahhlawhin a sawi ang chiah kha a ni ngei mai,” a ti a. 36Tin, heti hi a ni a, a sawi zawh veleh chuan ngai teh, lal fapate chu an lo thleng a, an aw chhuah meuhvin an ṭap a; tin, lal pawh chu a chhiahhlawhte nên chuan an ṭap ta vak vak mai a.
37Absaloma erawh chu a tlân bo va, Gesur lal Amihuda fapa Talmaia hnênah a kal a. Tin, Davida chuan ni tin a fapa chu a sûn a. 38Chutichuan, Absaloma chu a tlân bo va, Gesur ramah a kal a, chutah chuan kum thum a va awm a. 39Tin, Lal Davida chuan Absaloma hnêna kal a châk êm êm a. Amnona chungchâng thu-ah chuan a thlamuang ta a, ani chu a thi tawh si a.