Davidan Amon leh Suria mite a hneh

(1 Chro 19.1-19)
1Tin, heti hi a ni a, chûng hnuah chuan Amona thlahte lal chu a thi a, a fapa Hanuna chu a ai awhin a lal a. 2Tin, Davida chuan, “A pa chuan mi lo khawngaih angin kei pawhin Nahasa fapa Hanuna chu ka khawngaih ve ang,” a ti a. Chutichuan, Davida chuan a pa chungchâng thua thlamuan tûrin ama mite a tîr a. Tin, Davida mite chuan Amona thlahte ram an va thleng a. 3Nimahsela, Amona thlahte puipaho chuan an pu Hanuna hnênah chuan, “Davida hian i pa a zah avângin i hnênah thlamuantu a rawn tîr niin i ring em ni? Davida hian a mite hi khuate rawn tichhe tûra thlîthlai leh enthla tûrin i hnênah a rawn tîr a ni lâwm ni?” an ti a. 4Chutichuan, Hanuna chuan Davida mite chu a man a, an khabe hmul khingkhat a mehsak a; tin, an silhfênte chu a lai takah an mawng thleng pha chauhvin a tansak a, a kaltîr ta a. 5Tin, Davida an han hrilh chuan, a hmuak tûrin mi a tîr a; anni chu an zak hle mai si a. Tin, lal chuan, “In khabe hmul a chawr sei hma chu Jeriko-ah awm rih ula, chumi hnuah chuan in lo haw a ni ang chu,” a ti a.
6Tin, Amona thlahten Davida huat zâwng an lo ni ta tih an inhriat chuan, Amona thlahte chuan Beth-rehob-a mi Suria-ho leh Zoba-a mi Suria-ho sipai sînghnih leh, lal Maaka, a mi sângkhat nên, Tob mite sîngkhat leh sânghnih nên an chah a, an ruai a. 7Tin, Davidan chu chu a hriatin Joaba leh sipai huaisen zawng zawngte a tîr a. 8Tin, Amona thlahte chu an lo chhuak a, khaw luhna kawngkhâr lamah chuan ṭanhmun an siam a; tin, Zoba-a mi leh Rehob-a mi Suria-hote leh Toba leh Maaka hote erawh chu a hrangin phûlah an awm a. 9Chutichuan, an hma lam leh an hnung lamah an rawn bei dâwn tih Joaban a hriatin Israel mite zînga mi a ṭha ṭha a thlang chhuak a, Suria mite bei tûrin ṭanhmun a lo siam a. 10Tin, mi dang zawng zawng chu a unaupa Abisaia kutah a dah vek a, Amona thlahte bei tûrin ṭanhmun a siam bawk a. 11“Suria mite hi ka chelh dâwn loh chuan nangin min pui ang a; tin, nangin Amona thlahte i chelh dâwn loh chuan ka rawn pui ang che. 12Huai takin awm la, kan mite leh kan Pathian khaw chhanin i intipachang ang u; tin, Lalpa chuan ṭha a tih ang zêlin ti rawh se,” a ti a. 13Chutichuan, Joaba leh a hnêna mite chuan Suria mite bei tûrin indona hmun lam chu an va hnaih a; tin, a hmaah chuan an tlânchhia a. 14Tin, Amona thlahten Suria mite an tlânchhia tih an hriat chuan, anni pawh chu Abisaia hmaah chuan an tlânchhe ve ta a, khuaah chuan an lût a. Tin, Joaba chuan Amona thlahte chu a kîrsan a, Jerusalem-ah a haw ta a.
15Tin, Suria miten Israel-te hmaah an chan a chhe ta tih an lo hriat chuan an inpun khâwm a. 16Tin, Hadarezera chuan mi a tîr a, Lui piah lama Suria mite chu a hruai chhuak a, Hadarezera sipai hotu Sobaka chuan hma a hruai a; Helam-ah an kal a. 17Tin, chu chu Davida an hrilh a; tin, ani chuan Israel mi zawng zawng a ko khâwm a, Jordan lui an kai a, Helam-ah chuan an kal a. Tin, Suria mite chuan Davida do tûr chuan ṭanhmun an lo siam a, an lo bei a. 18Tin, Suria mite chu Israel-te hmaah chuan an tlânchhe ta a; tin, Davida chuan Suria mi tawlailîr zasarih chunga chuang leh sakawr chung chuang mi sîngli a that a; tin, an sipai hotu Sobaka pawh a that a, chutah chuan a thi ta a. 19Chutichuan, Hadarezera chhiahhlawha awm lal zawng zawngten Israel-te hmaah an chan a chhe ta tih an lo hriat chuan Israel-te nêna inremna an siam a, an chhiahhlawhah an awm ta a. Chutichuan, Suria mite chuan Amona thlahte chu an pui leh ngam ta lo va.