Jerusalem la ropui tûrzia

1Tho la, êng rawh; i êng chu a lo thleng a, Lalpa ropuina chu i chungah a lo chhuah tâk hi. 2Ngai teh, thimin leilung hi a khuh dâwn si a, thim chhah mupin mite a khuh bawk dâwn a ni; nimahsela, Lalpa chu i chungah a lo chhuak ang a, a ropuina chu i chungah a la lang ang. 3Tichuan, hnam tin i êng lamah an lo kal ang a, lalte pawh i lo chhuah ênna lamah an lo kal bawk ang. 4“Dâk la, i mit lên vêl la, en rawh: an zain an inkhâwm a, i hnênah an lo kal a nih hi; i fapate chu hla tak aṭangin an lo kal ang a, i fanute chu an rawn pawm ang. 5Chumi hnuah chuan i hmu ang a, i êng tawh ang a, i thinlung chu a khûr ang a, tihzauvin a awm ang; tuifinriata sumdâwnna tam tak mai chuan i hnên lam a pan dâwn avâng leh, hnam tin sum chuan i hnên a lo thlen dâwn avângin.
6“Sanghâwngsei tam tak mai chuan an tuam dûl dûl ang che, Midian leh Epha rama sanghâwngsei tuaite chuan; chûng zawng zawng chu Seba ram aṭangin an lo kal ang; rangkachak leh beraw an rawn phur ang a, Lalpa fakna thu an hriattîr ang. 7Kedar-ho ran rual zawng zawng chu i hnênah an lo kal khâwm ang a, Nebaioth-ho berâmpate chuan i rawng an bâwl ang; ka maichâmah chuan lâwmin an chho vang a, ka ropuina in chu ka chawimawi ang.
8“Chhûm anga thlâwkte leh, ṭhûro anmahni tukverh pana thlâwk noh noh anga thlâwkte saw tute nge ni? 9Ani chuan a chawimawi che avângin, Lalpa i Pathian hming atân leh Israel-ho Mi Thianghlima tân chuan i fapate an tangkarua leh rangkachak nên hla tak aṭanga hruai tûrin, matheilovin thliarkârte chuan mi nghâk ang a, Tarsis lawng liante chuan hmasak ber an chuh ang. 10Tin, ram dang mite chuan i kulh bangte chu an rem chho leh ang a, an lalte pawhin i rawng an bâwl tawh ang; ka thinrim chuan ka vua chia; nimahsela, ka duhsaknain ka khawngaih si che a nih hi. 11I kawngkhârte pawh hawnin a awm reng ang a, a chhûn a zânin an khâr lo vang; miten hnam tin sum chu i hnênah an rawn lâka, an lalte pawh an rawn hruai ve theih nân. 12I rawng bâwl duh lo hnam leh ram chu a boral dâwn si a; a ni, chûng hnamte chu tihchhiat hlauhvin an awm ang. 13Ka hmun thianghlim cheimawi tûrin Lebanon ropuina chu i hnênah a lo kal ang, fâr te, phân te, tufâr te chu an lo kal tlâng ang; tichuan, ka ke rahna hmun chu ka tiropui ang. 14Tin, nangmah tiretheituteho fapate chu kûnin i hnênah an lo kal ang a, nangmah hmusittute zawng zawng chu chibai bûkin i kephah hnuaiah an kûn ang; nang chu, ‘Lalpa khawpui’, ‘Israel-ho Mi Thianghlima Zion’ an ti ang che. 15Tu ma tlawh ngai loh khawpa kalsan leh huata i awm aiah kumkhaw chhuan ber, chhuan tam tak lâwmnaah ka siam ang che. 16Tin, hnam tin hnutetui i fâwp ang a, lalho hnute pawh i hne ang; kei Lalpa hi nangmah chhandamtu leh nangmah tlantu, Jakob-ho Mi Chaka chu ka ni tih i la hre bawk ang. 17Dâr aiah rangkachak ka rawn la ang a, thîr aiah pawh tangkarua ka rawn la ang, thing aiah pawh dâr, lung aiah pawh thîr. Thlamuanna chu i hotuah ka ruat bawk ang a, felna chu nangmah phûttuah ka ruat ang. 18Râwng taka thiltih thâwm chu i ramah hriat a ni tawh lo vang a, ṭiauna leh chhiatna thâwm pawh i ramri chhûngah hriat a ni tawh lo vang; i kulh chu ‘Chhandamna’ i ti zâwk ang a, i kawngkhârte pawh ‘Fakna’ i ti bawk ang.
19“Ni khi chhûnah nangmah êntu a ni tawh lo vang a, thla pawh khian ênna tûrin a tiêng hek lo vang che; Lalpa erawh chu i tân kumkhaw êntuah a awm ang a, i Pathian chu i ropuina atân a awm bawk ang. 20I ni chu a tla tawh lo vang a, i thla pawh chu a ral tawh hek lo vang; Lalpa chu i kumkhaw êntu a ni dâwn tawh si a, i lusûn nite chu a tâwp dâwn tawh a ni. 21I mite pawh an zain mi fel an ni ang a, i ram hi an luah kumkhua ang; chawimawia ka awm theihna tûrin anni chu a zung puak chhuak ka phun, ka kutchhuak chu an ni ang. 22In zînga hnam tê ber pawh hnam ropui tak an la ni ang a, hnam tlêm tê pawh hnam chak tak an la ni ang. Kei Lalpa hian a hun takah ka thlentîr thuai ang.