1Hêng zawng zawng dap chhuak tûr hian ka vei êm êm ṭhîn a: mi fel leh mi fing leh an thiltihte chu Pathian kuta awm a lo ni a. Hmangaihna a ni nge huatna tih mihringin an hre lo, an hmabâk a ni vek si. 2Mi zawng zawng chungah thil thuhmun a thleng a ni: khawrêl thuhmun chu mi fel leh mi suaksual te, mi ṭha te, mi thianghlim leh thianghlim lo te, inthawi mi leh inthawi lo mite chungah pawh, mi ṭha ang bawkin mi sual pawh, chhechham hmang ang bawkin chhechham duh lo mi pawh. 3Hei hi a ni, ni hnuaia thiltih zawng zawnga thil ṭha lo chu: mi zawng zawng chunga khawrêl thuhmun thleng hi. Mihring fate thinlung lah chu suala khat a ni a; an dam chhûngin an thinlungah âtna a awm a, chutih hnuah chuan mitthi hnênah an kal a. 4Mi nungdamte zînga la telte tân chuan beiseina a la awm a; sakeibaknei thi ai chuan ui nung takngial pawh a ṭha zâwk si. 5Mi nungdamte chuan an la thi dâwn tih an hre si a, mitthi erawh chuan eng mah an hre lo va, lâwmman an nei tawh ngai lo va, hriat reng pawh an hlawh tawh hek lo. 6An hmangaihna te, an huatna te, an îtsîkna te a boral daih tawh a ni, ni hnuaia thiltihahte hian chanvo rêng an nei tawh ngai hek lo.
7Kal la, lâwm takin i chaw ei la, thinlung hlimin i uain in rawh; Pathianin i thiltihte chu a pawm tawh si a. 8I silhfênte chu vâr reng sela, i lû pawh hram ngai suh se. 9Ni hnuaia a pêk che i hun engmahlo chhûng zawng chuan i nupui, i hmangaih hnênah chuan nun nuam takin awm rawh; chu chu dam chhûnga i chanvo leh ni hnuaia i thawh rimnaa i chanvo chu a ni si a. 10I kutin tih tûr a hmuh apiang chu theihtâwpin ti rawh; thlân i kalna tûrah chuan thiltih tûr emaw, remruat tûr emaw, hriatna emaw, finna emaw a awm si lo va.
11Ka han thlîr leh a, ni hnuaia intlânsiaknaah mi chak chu a hlawhtling chuang lo va, indonaah mi huai a hlawhtling chuang hek lo; mi fingin ei tûr a hmu bîk lo va, mi nikhaw hria an hausa chuang hek lo va, mi themthiamin duhsak an hlawh chuang hek lo, mi zawng zawng chungah hun leh khawrêl ang angin a thleng mai zâwk tih ka hmu a. 12Mihringin ama hun pawh a hre si lo va; sangha, lên hlauhawma man leh sava, thanga âwk ang maiin, mihring fate pawh an chunga lo thleng phutin hun ṭha lovah an âwk ṭhîn a ni.
13Ni hnuaiah chuan hetiang finna hi ka hmu bawk a, ka tân ropui hlein a lang. 14Khawpui tê tak tê, a chhûnga mi tlêm tê awmna chu a awm a; lal ropui takin a rawn bei a, a hual a, hual dai nasa tak a theu hnan a; 15tin, chu khuaah chuan mi rethei fing tak a awm a, a finnain khawpui chu a chhanchhuak ta a; mahse, tu mahin chu mi rethei chu an hre reng lo. 16Mi rethei finna chu hmuhsita awmin, a thu pawh ngaihthlâk ni lo mah sela, kei chuan, “Chakna aiin finna a ṭha zâwk,” ka ti tho a ni.
17Mi fingte thusawi zawi tê pawh, mi âte zînga rorêltu au vak aiin a hriat ṭhat theih zâwk. 18Finna chu indona hriamhrei aiin a ṭha zâwk a; mahse, mi sual pakhatin thil ṭha tam tak a tichhe ṭhîn.