Gedalia hnênah Jeremia a khawsa

1Judai leh Jerusalem sal zawng zawng, Babulon sala an hruaite zînga Jeremia khaidiat vuan chunga a hruai laia vêngtu hotu, Nebuzaradanan Rama aṭanga a chhuahtîr hnua Lalpa hnên ata Jeremia hnêna thu lo thleng chu. 2Tin, vêngtu hotu chuan Jeremia chu a hruai a, a hnênah, “Lalpa i Pathian chuan he hmuna thil ṭha lo lo thleng tûr hi a lo puang tawh a. 3Tin, Lalpa chuan a rawn thlentîr ta ngei a, a sawi ang zêlin a ti ta a; Lalpa chungah thil in tisual a, a ṭawngka in awih loh avângin he thil hi in chungah a lo thleng a nih hi. 4Tûnah chuan, ngai rawh, vawiin ni hian i kuta khaidiat bun chu ka phelhsak a che. Babulon-a ka hnêna lo kal i duh leh lo kal la, i duh loh leh lo kal lo mai rawh; en teh, ram zawng zawng i hmaa a awm hi, kal rem i tih leh ṭha i tihna apiangah kal ang che,” a ti a. 5A la kîr hmain ani chuan, “Juda khawpuite chunga awptua Babulon lalin a siam Saphana fapa Ahikama fapa, Gedalia hnênah kîr la, mite zîngah a hnênah awm rawh. A nih loh leh kal rem i tihna apiangah kal mai rawh,” a ti a. Tichuan, vêngtu hotu chuan ei tûr leh thilpêk a pe a, a kaltîr ta a. 6Tin, Jeremia chu Ahikama fapa Gedalia hnênah Mizpa khuaah a kal a, a hnênah a rama mi la awm chhunte zîngah chuan a awm ve ta a.

Juda ram awptu Gedalia

(2 Lal 25.22-24)
7Tin, sipai pâwl hotu zawng zawng ram laka awmte, anmahni leh an hote chuan, Babulon lalin Ahikama fapa Gedalia chu chumi rama mipate, hmeichhiate, naupangte leh mi rethei berte, Babulon sala hruai loh zawng zawng chu a kawltîr tih an lo hriat chuan, 8Mizpa khuaah Gedalia hnênah an lo kal a - Nethania fapa Ismaela te, Karea fa Johanana leh Jonathana te, Tanhumetha fapa Seraia te, Netophath khuaa mi Ephaia fapate leh Maakath khuaa mi fapa Jezania te leh an hote chu. 9Tin, Saphana fapa Ahikama fapa, Gedalia chuan anmahni leh an hote hnênah, “Kaldaite rawng bâwl chu hlau suh u; ramah hian awm hle hle ula, Babulon lal rawng bâwl ula, in tân a ṭha mai ang. 10Kei zawng Mizpa khuaah hian ka awm ang a, Kaldai mi ka hnêna lo kal tûrte hmaah chuan nangmahni aiawhin ka ding ang; nangni erawh chuan uain te, nipui thei te, hriak te la khâwm ula, in bêlah te dah ula, khawpui in lâk tâkahte chuan chêng rawh u,” tiin chhia a chham a. 11Chutiang bawkin Juda mi zawng zawng, Moab rama chêngte, Amon mite zînga chêngte leh Edom rama chêngte leh ram danga awmte chuan, Babulon lalin Juda mi ṭhenkhat a hnutchhiaha, an chungah Saphana fapa Ahikama fapa, Gedalia a dah tih an hriatin, 12Juda mi zawng zawng an hnawh darhna ram zawng zawng aṭangin an lo kîr a, Judai rama Mizpa khuaah Gedalia hnênah an lo thleng a, uain leh nipui thei an la khâwm ta ṭeuh mai a.

Gedalia thah thu

(2 Lal 25.25-26)
13Chu lo pawh chu Karea fapa Johanana leh sipai pâwlte hotu, ram laka awm zawng zawng chu Mizpa khuaah Gedalia hnênah an lo kal a, 14a hnênah, “Amon mite lal Baalisa chuan i nunna la tûrin Nethania fapa Ismaela a tîr tih i hria em?” an ti a. Ahikama fapa Gedalia erawh chuan a awih lo va. 15Tin, Karea fapa Johanana chuan Mizpa khuaa Gedalia hnênah, “Mi kaltîr teh khai, Nethania fapa Ismaela chu ka va that mai ang e, tu mân an hre lo vang. Juda mi i hnêna awm khâwm zawng zawng an darh veka, Juda mi awm chhunte boralna ti tûrin engah nge i nunna a lâk ang?” tiin a rûk têin a sawi a. 16Ahikama fapa Gedalia erawh chuan Karea fapa Johanana hnênah chuan, “He thil hi i ti tûr a ni lo; Ismaela i sawi dân hi a dik lo ve,” a ti a.